Cost of Living Support Icon

 

Cytuno ar ymateb y Cyngor i gynigion diweddaraf diwygio llywodraeth leol 

Mae cabinet Cyngor Bro Morgannwg wedi cytuno ar ymateb cadarn a thrylwyr i ymgynghoriad diweddaraf Llywodraeth Cymru ar ddiwygio llywodraeth leol.  

 

  • Dydd Mawrth, 22 Mis Mai 2018

    Bro Morgannwg



Mae’r ymateb yn gwneud gwrthwynebiad parhaus y cabinet i uno cynghorau yn glir ac yn ategu ei safbwynt fel awdurdod lleol sy’n perfformio’n dda ac y mae ganddo gysylltiadau democrataidd cryf â’i drigolion, sef y dylai Cyngor Bro Morgannwg barhau fel corff unigol.

Dywedodd y Cyng. John Thomas, Arweinydd y Cyngor: “Nid yw’r ddadl dros uno cynghorau wedi ei hennill o bell ffordd. Ymddengys taw sylfaen y papur gwyrdd yw adroddiad diffygiol Comisiwn Williams o 2014 ac unwaith eto, nid yw’n ystyried y gost enfawr a allai godi o uno cynghorau ac nid yw chwaith yn cynnig unrhyw fanylion ar yr arbedion honedig a wneid yn sgil yr uno. 

 

Cllr Thomas

“Dyw mwy ddim yn golygu gwell. Does dim perthynas rhwng maint Cyngor a’i berfformiad a’i effeithlonrwydd. Mae Cyngor Bro Morgannwg wedi ei gydnabod fel y cyngor sydd yn perfformio orau yng Nghymru am dair blynedd o’r bron. Ni ddylid peryglu’r llwyddiant amlwg hwn i ateb anghenion preswylwyr y Fro.  

 

“Mae Cyngor y Fro, yn rhinwedd ei aelodau etholedig, yn agos at y cymunedau y mae’n eu gwasanaethu. Byddai colli’r cyswllt hwn drwy uno’r Fro ag ardal sydd yn sylweddol wahanol iddi yn gwneud tro gwael â’r preswylwyr. 

 

“Mae’r syniad bod yn rhaid gorfodi cynghorau i uno er mwyn iddynt gydweithio’n well â’i gilydd hefyd yn methu â chydnabod faint o weithio ar y cyd y mae’r cyngor hwn yn enwedig eisoes yn ei wneud, nid gydag awdurdodau lleol cymdogol yn unig, ond hefyd gyda phartneriaid eraill yn y sector cyhoeddus, preifat a gwirfoddol.

 

“Ni all ein gwrthwynebiad i’r cynigion diweddaraf hyn fod dim cliriach nag yn yr ymateb drafft y cytunwyd arno heddiw. Bydd cyfle nawr gan holl gynghorwyr y Fro i rannu eu barn yn ffurfiol cyn cyflwyno ymateb terfynol y Cyngor i Lywodraeth Cymru. 

 

“Mae’n fesur o pa mor wael yw’r cynllun diweddaraf i ymyrryd â llywodraeth leol yng Nghymru, ac o ba mor negyddol y byddai’r effaith ar y Fro, ac rwy’n disgwyl i gyfeillion o bob plaid wleidyddol uno ynghyd, fel y gwnaethant eisoes, i'w wrthod yn unfryd."

Gall preswylwyr weld yr ymateb drafft yn llawn ar-lein. Yn dilyn craffu gan Bwyllgor Craffu Perfformiad ac Adnoddau Corfforaethol y Cyngor ar 24 Mai bydd yn cael ei baratoi gan y cabinet ar 4 Mehefin a’i gyflwyno i Lywodraeth Cymru.