Eisteddfod Genedlaethol Bro Morgannwg,
4-11 Awst 2012
26 Tachwedd 2012
Wedi i ni ffarwelio â'r Pafiliwn Pinc a'r holl ymwelwyr a
ddaeth i'r Eisteddfod, gall y Fro ymfalchïo yn llwyddiant
y Brifwyl am flynyddoedd i ddod, er gwaethaf ambell ddiwrnod o
dywydd mawr.
Daeth cyfanswm o 138,767 o bobl trwy'r clwydi i fwynhau'r
cystadlu, yr awyrgylch, y gweithgareddau a holl hwyl y Maes.
Uchafbwyntiau Eisteddfod 2012
* Enillwyd y Goron gan Gwyneth Lewis, a Gwobr Goffa Daniel Owen
gan Robat Gruffudd. Dylan Iorwerth oedd enillydd y Gadair, a
dyfarnwyd y Fedal Ddrama i Bedwyr Rees.
* Bu cyngerdd y noson agoriadol yn llwyddiant ysgubol, a phob
tocyn wedi ei werthu. Cyflwynwyd aelodau newydd y corau poblogaidd,
Only Vale Kids Aloud, a mawr fu'r canmol iddynt. Ymhlith
llwyddiannau'r nosweithiau eraill, roedd perfformiad cyntaf gwaith
newydd Karl Jenkins, 'Beirdd Cymru', gyda chôr yr Eisteddfod, nos
Sadwrn, a'r Gala Gomedi gyntaf erioed ar y nos Fawrth. Daeth
cannoedd o bobl i gael llond bol o chwerthin mewn noson arbennig o
dda, er gwaetha'r glaw mawr a'r mwd - da 'di Eisteddfodwyr.
| * Daeth aelodau o dimau chwaraeon Gleision Caerdydd a Chlwb
Criced Morgannwg i ardal chwaraeon a chwarae Cyngor Bro Morgannwg i
gymryd rhan mewn sesiynau hyfforddi a hwyl gyda phlant a phobl
ifanc. Da oedd gweld Chris Coleman a John Hartson yno hefyd - enwau
mawr ym meysydd rhai o'n hoff chwaraeon tîm.
* Cynhaliwyd gweithgareddau poblogaidd ym Mhafiliwn y
Cyngor hefyd, gan gynnwys arddangosiadau coginio, paentio wynebau,
gweithdai plethu helyg ac adrodd straeon. Roedd y stondin yn brysur
gydol yr wythnos.
* I gyd-fynd â dyfodiad yr Eisteddfod Genedlaethol â bro mebyd
Iolo Morganwg, lansiwyd taith gerdded newydd, Cylchdaith Iolo, i
ddathlu athrylith y dyn a ddylandwadodd mor drwm ar Eisteddfod
heddiw. Mae'r daith yn un barhaol, er bod yr Eisteddfod wedi
ffarwelio, felly dewch i'w mwynhau os ydych chi'n hoff o'ch
teithiau cerdded
* Ac yn olaf, diolch yn fawr iawn i chi i gyd am eich cefnogaeth
dros y deunaw mis diwethaf. Boed hynny ar bwyllgor, wrth godi
arian, wrth wirfoddoli fel stiwardiaid a chynorthwywyr, trwy
fynychu'r Brifwyl neu swyddogaethu mewn unrhyw fodd, ffurfiol
ac anffurfiol, roedd pob cyfraniad yn cyfrif. Fyddai'r Eisteddfod
ddim wedi llwyddo fel y gwnaeth heboch chi. Diolch o
galon.
|
|
|