Dechrau cyfri’n ôl i Eisteddfod Genedlaethol Y Fro yn
Llandŵ
Cyhoeddwyd 30 Ionawr 2012
I nodi chwe mis tan ddechrau’r Eisteddfod
Genedlaethol ym Mro Morgannwg ar 4 Awst 2012, mae Cyngor Bro
Morgannwg yn gosod cloc cyfri’n ôl ar ei wefan, http://www.bromorgannwg.gov.uk/.
Mae’r Eisteddfod yn ymweld â’r ardal am y tro cyntaf ers 1968, ac
mae disgwyl mawr amdani.
Mae’r cloc yno i atgoffa trigolion y Fro bod
amser ganddyn nhw i gymryd rhan mewn gweithgareddau i godi arian ar
gyfer y digwyddiad yn Llandŵ, a all ddisgwyl croesawu hyd at
165,000 o ymwelwyr.
Bydd y cloc, sydd wedi ei rannu’n ddiwrnodau,
oriau a munudau, hefyd yn atgoffa pobl am ddyfodiad cyffro’r
Brifwyl ymhen misoedd yn unig.
Dywedodd arweinydd Cyngor Bro Morgannwg, y
Cynghorydd Gordon Kemp: “Mae’r Eisteddfod Genedlaethol yn Ŵyl
ddiwylliannol bwysig yn rhyngwladol, ac mae’n dathlu nid yn unig
elfennau cryfaf Cymru, ond a fydd hefyd yn denu nifer fawr o
ymwelwyr i Fro Morgannwg.
“Bydd y cloc cyfri’n ôl yn adlewyrchu’r
cynnydd yn y cyffro pan fydd cyfnod yr Eisteddfod yn dod yn nes,
a’r paratoadau’n prysuro.
“Mae hwn yn gyfle gwych i gynyddu proffil y
Fro, yn enwedig i’r trefi sydd agosaf at Landŵ, sef Y Bont-faen a
Llanilltud Fawr.”
Mae tudalennau’r Eisteddfod ar wefan Cyngor
Bro Morgannwg yn cynnwys gwybodaeth am y Brifwyl a’i chystadlaethau
yn ogystal â’r newyddion diweddaraf. Gallwch chi hefyd ganfod
gwybodaeth ar wefan y Cyngor am atyniadau’r Fro, o’r dirwedd i’r
adnoddau hamdden.
Buasai’r Cyngor yn hoffi clywed gan drigolion
y Fro sy’n cofio’r tro diwethaf y daeth yr Eisteddfod i’r Fro yn
1968.
Os oes gyda chi atgofion, lluniau neu greiriau
yr hoffech eu rhannu, e-bostiwch nhw at: webpublish@valeofglamorgan.gov.uk.
I weld tudalen Eisteddfod y Fro ar wefan y
Cyngor, ewch i:
http://www.valeofglamorgan.gov.uk/enjoying/eisteddfod_2012.aspx?lang=cy-gb