Cyngor Bro Morgannwg ar restr fer Gwobr Cyflog Byw Genedlaethol
Mae Cyngor Bro Morgannwg wedi cyrraedd y rhestr fer ar gyfer gwobr genedlaethol sy'n cydnabod ei arweinyddiaeth o ran hyrwyddo cyflog teg.
Mae'r Cyngor yn rownd derfynol yng nghategori Arweinydd Cyflog Byw (Sector Cyhoeddus) yng Ngwobrau Hyrwyddwyr Cyflog Byw 2026 y Sefydliad Cyflog Byw.
Mae'r gwobrau yn dathlu sefydliadau sy'n mynd uwchben a thu hwnt yn eu hymrwymiad i'r Cyflog Byw go iawn, gan dynnu sylw at y rhai sy'n sbarduno newid o fewn eu sectorau a'u cymunedau.
Mae rhestr fer y Cyngor yn adlewyrchu ei ymrwymiad cryf a pharhaus i sicrhau bod cyflogeion yn cael cyflog sydd hefyd yn cwrdd â chost byw go iawn.
Mae'r gydnabyddiaeth hon yn adeiladu ar achrediad diweddar y Cyngor fel cyflogwr Cyflog Byw Go Iawn, sy'n golygu y bydd holl staff y Cyngor bellach yn derbyn o leiaf £13.45 yr awr, i fyny o £12.60, sy'n uwch na'r isafswm cyflog sy'n ofynnol yn gyfreithiol o £12.21 yr awr.
Yn ogystal â chefnogi ei weithlu ei hun, mae'r Cyngor hefyd yn gweithio gyda chyflenwyr a phartneriaid i annog mabwysiadu'r Cyflog Byw Go Iawn yn ehangach ledled Bro Morgannwg.
Dywedodd Laithe Bonni, Rheolwr Gweithredol yng Ngwasanaethau Gweithwyr Cyngor Bro Morgannwg: “Rydym wrth ein bodd ein bod wedi cyrraedd y rhestr fer ar gyfer y wobr genedlaethol hon, gan ei fod yn wirioneddol yn adlewyrchu'r pwysigrwydd rydym yn ei roi ar gefnogi ein gweithlu drwy arferion cyflog teg, sydd yn ei dro yn cael effaith uniongyrchol ar sut rydym yn gwella'r ffordd rydym yn cefnogi'r rhai sydd eu hangen fwyaf ar draws ein cymunedau.
“Mae llawer o weithwyr y Fro yn byw yn y cymunedau y maent yn eu gwasanaethu a thrwy sicrhau eu bod yn cael Cyflog Byw go iawn, rydym hefyd yn cefnogi economïau lleol ac yn gwella lles cyffredinol.”
Bydd enillwyr Gwobrau Hyrwyddwyr Cyflog Byw 2026 yn cael eu cyhoeddi mewn seremoni genedlaethol yn ddiweddarach eleni.