Canlyniadau Safon Uwch yn Torri Record yn Ysgol Llanilltud Fawr
Mae Ysgol Llanilltud Fawr yn dathlu ei chanlyniadau Lefel A gorau erioed wedi i bron i hanner y grŵp blwyddyn ennill y graddau uchaf un.
Llwyddodd 44 y cant o ddysgwyr i ennill graddau A* neu A, roedd 89 y cant wedi ennill graddau A* i C a 99 y cant wedi cofnodi graddau A* i E.
Roedd ychydig o berfformiadau nodedig yn cynnwys Maddison Lindsay a gyflawnodd A*, A, A, A, ac mae bellach yn mynd i Brifysgol Harper a Keele i astudio Meddygaeth Filfeddygol.
Llwyddodd Mathew Bramhall i ennill A*, A* mewn Seicoleg a Daearyddiaeth a Rhagoriaeth mewn Chwaraeon, gan ddangos llwyddiant academaidd a galwedigaethol.
Enillodd Alex Robson A, A, A mewn Daearyddiaeth, Seicoleg a Bagloriaeth Cymru a Rhagoriaeth * mewn Chwaraeon.
Sicrhaodd Abigail Fisher A* A* A trawiadol a llwyddodd Bethan Rendall i ennill pedair gradd A.
Dywedodd Rob Jones, Cyfarwyddwr y Chweched Dosbarth: “Rwyf mor falch o gyflawniadau'r grŵp eleni. Mae'r set eithriadol hon o ganlyniadau Safon Uwch yn wirioneddol yn adlewyrchu ymroddiad a gwytnwch pob un o'n myfyrwyr. Da iawn Blwyddyn 13 - mae gwaith caled yn talu ar ei ganfed!”
Dywedodd Charlotte Robins, Pennaeth Ysgol Llanilltud Fawr, “Gwnaeth pob un o'n dysgwyr yn wych ac maent yn glod llwyr i'r ysgol.
“Mae'r canlyniadau hyn sy'n torri record yn adlewyrchu nid yn unig waith caled a phenderfyniad ein myfyrwyr, ond hefyd ymroddiad ein staff talentog a'n tîm chweched dosbarth.
“Maent yn dangos y diwylliant cryf o ddyhead sy'n rhan annatod o Chweched Dosbarth Ysgol Llanilltud Fawr. Mae llywodraethwyr, staff a theuluoedd yn hynod falch o bob un o'n disgyblion talentog. Edrychwn ymlaen at ddysgu am eu llwyddiant parhaus wrth iddynt symud ymlaen i'r bennod gyffrous nesaf hon o'u bywydau.