Uchafbwyntiau Pride 2022

Roedd cydweithwyr a chynghorwyr ymhlith y miloedd a ymunodd â gorymdaith Pride Cymru yng Nghaerdydd.

Ddydd Sadwrn diwethaf daeth dros 20 o staff y Fro ynghyd i orymdeithio. Roedd hyn yn dilyn sawl digwyddiad ymgysylltu i greu placardiau, baneri a baneri bach ar gyfer y digwyddiad.

Dechreuodd yr orymdaith eleni ar Heol y Frenhines, wrth i'r gorymdeithwyr wau eu ffordd trwy ganol y ddinas, cyn gorffen ar Heol y Gogledd ger Amgueddfa Caerdydd. Roedd llawer o wylwyr yn cymeradwyo’r orymdaith, oll yn gwisgo eu dillad amryliw gorau.

Aeth llawer ohonynt i'r digwyddiad Pride ei hun, a gynhaliwyd ar Lawntiau'r Ddinas. Roedd perfformwyr fel Mel C, a gyrhaeddodd rownd derfynol Ru Paul's Drag Race, Bimini Bon Boulash a’r dalent leol, Polyamorous, ymhlith y rhai ar y llwyfan.

Roeddem yn falch o weld ystod mor amrywiol o bobl - gan gynnwys breninesau drag, ymgyrchwyr LHDT+, grwpiau crefyddol ac eraill oedd yn cynrychioli'r gymuned.

Dywedodd Tom Narbrough, cadeirydd rhwydwaith LGBT+ y Cyngor, GLAM: "Roedd bod yn rhan o Pride 2022 wir yn brofiad rhyfeddol, ac yn un rwy'n ddiolchgar iawn amdano. Hon oedd fy mlwyddyn gyntaf i fynd fel cadeirydd y rhwydwaith ac roeddwn yn falch o weld ein presenoldeb mwyaf erioed yn y digwyddiad.

"Yn fwy na dim, roeddwn i'n rhyfeddu at weld cynifer o bobl ar y strydoedd. Yn bendant dyma oedd y nifer mwyaf o aelodau’r cyhoedd dwi wedi’i weld, a'r cymeradwyo, y dawnsio a'r anogaeth oedd uchafbwynt y dydd. Roedd y cyhoedd yn falch ohonon ni, ac roedden ni'n teimlo'r un mor falch o sefyll allan a chynrychioli'r Fro!"

Meddai Elyn Hannah, a ddechreuodd yn ei rôl fel Swyddog Cydraddoldeb ym mis Mai: "Hwn oedd fy Pride cyntaf. Roedd yn llawer o hwyl - yn barti ac yn gymysgedd anhygoel o liwiau, amrywiaeth a mynegiant. Roeddwn yn hynod falch o gymryd rhan ochr yn ochr â chydweithwyr o GLAM a ffrindiau a theuluoedd aelodau, gan gynrychioli'r gwaith cadarnhaol y mae GLAM a Chyngor Bro Morgannwg yn ei wneud. Roeddwn i eisiau cymryd rhan yn Pride i wneud yr hyn a alla i fel cynghreiriad i helpu i gefnogi, codi ac, yn bwysicach na dim ar yr achlysur hwn, ddathlu pobl LHDTQ+."

Hoffem ddiolch i bawb a ddaeth i’r digwyddiad ac a helpodd i’w drefnu. Mae paratoadau eisoes ar y gweill ar gyfer Pride y Barry, y Rhws a’r Bont-faen, a fydd i gyd yn cael eu cynnal yn yr Hydref. 

Os hoffech ddysgu mwy am GLAM a digwyddiadau yn y dyfodol, cysylltwch a Tom Narbrough at tnarbrough@valeofglamorgan.gov.uk