Diwrnod gyda Pantri FoodShare Llanilltud Fawr

08 Mai 2025

Bob bore Iau, mae cynwrf o symudiad i mewn ac allan o’r Pantri FoodShare yn Llanilltud Fawr — gyda phobl yn gosod byrddau, rhoi cynnyrch ffres allan a stocio silffoedd wrth iddynt baratoi i agor eu drysau yn adeilad canolfan gymunedol CF61 yn Llanilltud Fawr i'r gymuned leol.

Mae mwy o wirfoddolwyr FoodShare yn dechrau cyrraedd yn frysiog wrth i bobl leol ddechrau ciwio ymhell cyn oriau agor y pantri rhwng 12:00yp a 14:00yp.

Yn allweddol i Brosiect Bwyd Llanilltud Fawr, mae'r Pantri yn brosiect sy'n agored i bawb, gyda'r nod o atal ansicrwydd bwyd a gwastraff bwyd.

Gall trigolion o'r gymuned leol ddod bob wythnos i ychwanegu at eu siop wythnosol am ffracsiwn o brisiau archfarchnadoedd, tra hefyd yn gwneud eu rhan i atal bwyd dros ben rhag mynd i safleoedd tirlenwi. 

Dywedodd Nic, sy'n goruchwylio'r Patri FoodShare yn Llanilltud Fawr, nad oes unrhyw ddiwrnod yr un fath: “Rydyn ni yma bob dydd Iau yn Llanilltud Fawr, ac rydym hefyd yn rhedeg yn Sain Tathan bob yn ail ddydd Mercher hefyd. 

“Mae ein gwirfoddolwyr eisoes yma am gwpl o oriau yn setio pethau lan cyn i ni agor y drysau i bobl ddod i mewn a chael gafael ar fwyd dros ben. Rydym hefyd yn ychwanegu at yr hyn sydd ar gael fel y gall pobl wneud prydau cyfan ac bydd gwirfoddolwyr yma i dderbyn y danfoniadau a setio pethau lan y diwrnod cynt hefyd.

“Am bum punt, maen nhw'n cael gwneud siop fwyd lle gallant ddewis un eitem allan o'r rhewgell, un eitem allan o'r oergell, chwe eitem o'r silffoedd a chyfran deg o'r swm o ffrwythau, llysiau a chynhyrchion becws sydd gennym ar gael.”

Ychwanegodd: “Mae tarddiad y pantri yn mynd yn ôl i tua 2017, ond i ddechrau, dim ond bwrdd ar ddiwedd y dydd oedd gyda pha bynnag gwastraff o’r archfarchnad oedd ar gael - dim ond un bwrdd o fara a chynhyrchion eraill ble y gallai pobl yn y gymuned leol ddod i gael mynediad am ddim, a dim ond er mwyn helpu i ddiogelu'r amgylchedd ac atal gwastraff bwyd. 

“Ers hynny mae wedi esblygu i'r prosiect enfawr sydd heddiw - rydym yn gwasanaethu rhwng 70 a 80 o aelwydydd yr wythnos ar gyfartaledd yn Llanilltud Fawr gyda mwy ar ben hynny ym mhantri Sain Tathan hefyd, felly mae'n brosiect eithaf mawr nawr.”

Ers ei sefydlu, mae'r Pantri FoodShare — sy'n cael ei reoli a'i ariannu a'i gefnogi gan GVS ac ystod o sefydliadau gan gynnwys Cyngor Bro Morgannwg, Iechyd Cyhoeddus Cymru, Y Loteri Genedlaethol a Sefydliad Moondance - wedi dod yn rhan allweddol o ganolbwynt cymunedol ehangach sydd bellach yn gweithredu yn adeilad CF61.

Bob trydydd dydd Iau o'r mis, mae amrywiaeth o dimau’r Cyngor yn cysylltu â phartneriaid allanol - fel Pantri FoodShare - ar gyfer sesiwn Galw Heibio Cymunedol yn CF61, fel rhan o Brosiect Bwyd Llanilltud, er mwyn cynorthwyo darparu ystod eang o gymorth a gwasanaethau i breswylwyr.

Yna gellir cyfeirio preswylwyr sy'n mynychu’r Pantri er enghraifft, at gymorth uniongyrchol yn yr ystafell drws nesaf gan sefydliadau lleol eraill, prosiectau a gwasanaethau y Cyngor a allai fod yn ddefnyddiol iddynt.

Parhaodd Nic: “O ran bod y cyfan o dan yr un to, mae gennych fynediad at bethau fel y Chatty Caffi ar y safle - mae'n gwneud gwahaniaeth enfawr, ac rydyn ni'n wirioneddol lwcus bod hyn wedi dod yn ganolbwynt i bobl yn y gymuned.

“Mae pobl yn tueddu i ddod i siopa gyda ni ar yr un pryd, ac yn gyffredinol mae'r un bobl yn gweld ei gilydd hefyd ar yr un pryd bob wythnos, ac mae hynny'n hynod werthfawr i lawer o'n cwsmeriaid.

“Y rhythm hwnnw, y cysylltiad cymdeithasol wythnosol, nid yn unig gyda’i gilydd fel cwsmeriaid, ond gyda'r staff a'r gwirfoddolwyr yma, gyda'r gwirfoddolwyr sydd yn y Chatty Caffi a’r Banc Dillad, a gyda staff y Cyngor yn y canolfan gyngor. Mae'n gasgliad anhygoel o gyfleusterau a gwasanaethau yr ydym wedi bod yn ffodus iawn i allu eu cynnig i bobl, mae'n anhygoel.”

Nid oes meini prawf cymhwysedd ar gyfer siopa yn y Pantri ac mae staff a gwirfoddolwyr yn pwysleisio, p'un a ydych chi'n profi angen cael gafael ar fwyd neu os hoffech helpu i atal gwastraff bwyd, mae croeso i bawb.

Cynhelir Pantri FoodShare Llanilltud Fawr yn adeilad CF61 yng nghanol Llanilltud Fawr (Heol yr Orsaf, CF61 1ST) bob dydd Iau rhwng 12:00yp – 14:00yp. 

Gellir archebu slotiau ar gyfer y Pantri FoodShare yma.