Dathlu Cerrig Milltir Bywyd gyda’r Tîm Cofrestru 

13 Tachwedd 2025

Yng nghanol ein cymuned, mae'r Tîm Gwasanaeth Cofrestru yn parhau i ddisgleirio fel goleuadau proffesiynoldeb, tosturi ac ymroddiad. Boed hynny'n croesawu bywyd newydd i'r byd, ymrwymiadau gydol oes, neu'n cefnogi teuluoedd trwy golled, mae'r tîm bach ond nerthol hwn yn trin pob eiliad gyda gras, diwydrwydd a gofal.

Dros y flwyddyn ddiwethaf, mae'r tîm wedi mynd uwchlaw a thu hwnt - addasu i ddeddfwriaeth sy'n newid, cofleidio trawsnewid digidol, a chynnal y safonau gwasanaeth uchaf. 

O'r ddesg flaen i'r ystafell seremoni, mae pob aelod yn chwarae rhan hanfodol wrth wneud cerrig milltir mwyaf arwyddocaol bywyd yn gofiadwy ac yn ystyrlon.

Wrth y llyw mae Hayley Jefferies, Cofrestrydd Arolygol a Rheolwr Gwasanaeth Cofrestru, sy'n dathlu ei blwyddyn gyntaf yn y rôl. Ar ôl gweithio ei ffordd i fyny o'r Cofrestrydd Rhyddhad i Swyddog Cofrestru ac yna Uwch Swyddog Cofrestru, mae Hayley yn hen law erbyn hyn.

“Dwi wedi mwynhau'r heriau yn fawr iawn. Nid yw dau ddiwrnod byth yr un peth. Mae bod yn rheolwr gweithredol yn golygu y gallaf ddeall y materion ar lawr gwlad a chefnogi fy nhîm gyda gwasanaeth cofrestru sy'n newid yn barhaus.”

Mae blwyddyn gyntaf Hayley mewn arweinyddiaeth wedi cael ei llenwi â chyflawniadau ac adborth cadarnhaol gan y cyhoedd.

Ychwanegodd: “Rydym wedi derbyn adborth hyfryd gan ein cyplau, ac mae'r rhain yn brawf o fy nhîm anhygoel.”

Ochr yn ochr ag arweinyddiaeth Hayley, cefnogir y tîm gan gyfoeth o brofiad - dim mwy felly na Gennie Dixon, sydd wedi bod yn rhan o'r Gwasanaeth Cofrestru ers 37 mlynedd anhygoel. 

Mae ei hangerdd a'i hymroddiad wedi ei gwneud yn wyneb cyfarwydd a hoff iawn i genedlaethau o drigolion: “Ar ôl bod yn y Gwasanaeth Cofrestru ers 37 mlynedd, mae'n deg dweud fy mod i’n caru fy swydd. Dwi wedi gweld llawer o newidiadau o fewn y gwasanaeth dros y blynyddoedd a gobeithio y byddaf o gwmpas ar gyfer llawer mwy!”

Mae ei gyrfa wedi ei llenwi ag eiliadau bythgofiadwy: “Bu llawer o briodasau cofiadwy - o wisg ffansi gyda Mr Blobby yn bownsio o gwmpas yn y cefndir gan ei fod o methu eistedd i lawr yn ei sedd - i seremoni thema Star Wars gyda Storm Troopers a Darth Vader yn anadlu’n ddwfn - mae llawer gormod i'w rhestru! 

“Mae'r anrhydedd o allu 'priodi' fy mrawd ym Mhafiliwn Penarth wedi bod yn rhan arbennig o fy swydd. Nid oes un briodas erioed yr un fath ac mae'n llawenydd cael bod yn rhan o ddiwrnod arbennig y cyplau.”

Nid priodasau yn unig sy'n gwneud y rôl yn ystyrlon: “Mae llawer o fabanod dwi wedi'u cofrestru yn ystod y blynyddoedd, wrth wirio eu dogfennau adnabod, i ddarganfod fy mod wedi cofrestru eu neiniau a theidiau blynyddoedd yn ôl, mae hynny bob amser yn arbennig – er yn gwneud i mi deimlo'n hen!”

“Fy mhrif angerdd dros fy swydd yw helpu teuluoedd mewn profedigaeth wrth gofrestru marwolaeth eu hanwyliaid. Mae'n rhoi boddhad gwaith go iawn i mi, ar un o ddiwrnodau anoddaf eu bywydau, y ffaith fy mod i’n gallu eu helpu i fynd trwy'r cofrestriad, gan wneud y profiad cyfan yn llai brawychus na'r hyn roeddent yn disgwyl iddo fod. 

“Mae'r teuluoedd yn y pen draw yn siarad ac yn hel atgofion a hyd yn oed yn dangos lluniau i mi. Os yw'n rhoi cysur iddyn nhw, yna rydym yn cymryd amser allan a chael sgwrs. Ar sawl achlysur gofynnon nhw sut ydw i’n wneud fy swydd o ddydd i mewn gan fy mod yn bennaf yn cofrestru marwolaethau gydag ychydig o gofrestriadau genedigaethau yn y gymysgedd, ac mae'n syml - dwi wrth fy modd yn gweithio gyda'r cyhoedd a dwi wrth fy modd yn helpu pobl.”

Fel llawer yn y tîm, mae hi'n priodoli llawer o'i llawenydd yn y swydd i'w chydweithwyr: “Mae angen sôn hefyd bod gennym y tîm gorau o fewn y Gwasanaeth Cofrestru. Nid cydweithwyr gwaith yn unig ydyn ni, ond ni’n ffrindiau da ac yn deulu gwaith anhygoel, ac mae hynny'n gwneud cymaint o wahaniaeth. Mae'n hyfryd dod i'r gwaith.”

Adborth calonog gan drigolion hapus

Nid yw ymroddiad y gwasanaeth yn mynd yn ddisylw - ac mae'r adborth gan gyplau sydd wedi dathlu eu priodasau eleni yn dweud y cyfan.

Dywedodd un cwpl: “Aeth Stella uwchben a thu hwnt o'r diwrnod y gwnaethom archebu ein priodas. Naethon ni siarad a hi ychydig o weithiau, ac doedd dim byd yn ormod o drafferth. Roedd hi'n anhygoel mewn gwirionedd. Fe wnaethon ni gysylltu’n syth wrth gwrdd â hi, ac roedd Karen yn hyfryd hefyd, a thraddododd y seremoni gydag emosiwn calon ac roedden ni’n teimlo fel ein bod wedi ei hadnabod ers amser maith. Gwnaeth ein holl westeion sylwadau ar ba mor ddiffuant oedd hi, a gwnaeth ein diwrnod mor arbennig a chofiadwy mewn gwirionedd. Diolch yn fawr Stella a Karen!!”

Ychwanegodd cwpl arall: “Roedd Barbara a Christine yn hollol wych! Gwnaethant ein diwrnod mor arbennig a hyd yn oed wedi llwyddo i'n cadw ar wahân nes i'r seremoni ddechrau. Fe wnaethant dynnu lluniau gwych ohonom i gyd gyda'n gilydd ac roedden nhw mor garedig, meddylgar, a chefnogol drwyddi draw. Rydym mor ddiolchgar iddyn nhw am helpu i wneud ein diwrnod yn wirioneddol gofiadwy.”

Mae'r Gwasanaeth Cofrestru yn parhau i ddangos y gorau o wasanaeth cyhoeddus. Bob dydd, maent yn helpu trigolion i nodi eiliadau mwyaf arwyddocaol bywyd gyda llawenydd, urddas, tosturi, a gofal.

Boed yn briodas llawen, cofrestru dyfodiad newydd, neu'n cefnogi teulu trwy golled, mae'r tîm yn chwarae rhan dawel ond hanfodol yn stori ein cymuned - un sydd wir yn gwneud gwahaniaeth.