O LA i'r Barri — Arddangosfa yn Nodi Dychwelyd Ffotograffydd i’w Cartref

20 Ebrill 2026

Beth mae'n ei olygu cael lle yng nghanol eich cymuned lle gall creadigrwydd dyfu a chael ei rannu? 

Yn Oriel Gelf Ganolog yn Llyfrgell y Barri, mae'r cwestiwn hwnnw'n cael ei ateb mewn ffordd bwerus trwy Otrovert, yr arddangosfa newydd gan y ffotograffydd Lloyd Pursall.

Yn nodi ei sioe unigol gyntaf yn y DU, mae Otrovert yn nodi dychwelyd adref i Lloyd. Ar ôl gadael y Barri yn 18 oed a threulio bron i ddegawd yn Los Angeles yn adeiladu gyrfa lwyddiannus ym maes ffotograffiaeth ffasiwn a phortreadu enwogion, mae Lloyd wedi dychwelyd i'r man lle dechreuodd y cyfan.

“Mae wedi bod yn brofiad gwerth chweil iawn, ac yn iacháu mewn gwirionedd - a dod yn ôl i'r Barri, mae wedi bod yn gyffrous iawn ac yn brydferth iawn cysylltu â'm gwreiddiau a gallu dod â'm gwaith yn ôl adref a gweithio gyda phobl leol.”

Archwilio'r Gofod Rhwng Dau Begwn

Mae'r gair otrovert wedi'i wreiddio yn y gair otro yn Sbaeneg (arall) a'r gair vert Lladin (i droi), gan ddisgrifio'r rhai nad ydynt yn eistedd yn daclus fel naill ai mewnblygwyr neu allblygwyr. Dyma'r gofod rhwng y ddau yn ôl y ffotograffydd, ble mae’n teimlo'n fwyaf cyfforddus yn ei archwilio.

Er bod elfennau o'i waith gyda proffil uchel - fel casgliad o bortreadau o'r actor Cynthia Erivo o Wicked - yn bresennol yn yr oriel, y darnau mwy personol sy'n rhoi dyfnder emosiynol i Otrovert. 

Mae portreadau o bobl o'r Barri yn eistedd ochr yn ochr â thirweddau a delweddau ar arddull golygyddol, pob un ohonynt yn cael eu trin gyda'r un lefel o ofal a bwriad.

Celf Hygyrch

I Lloyd, roedd dod â'r arddangosfa hon yn ôl i'r Barri yn ymwneud â mwy nag arddangos gwaith - roedd yn ymwneud ag agor drysau.

“Rwy'n credu bod cael y gofodau yma o fewn y gymuned - i ferched a bechgyn allan yno ar hyn o bryd fyddai’n debyg i fi fy hun yr un oed - ac os gallant ddod i ofod o fewn eu cymuned a gweld y gwaith gan wybod fy mod i wedi dod o'r un lle â nhw ac os yw hynny'n eu hysbrydoli i fynd ar ôl eu breuddwydion a mynd ar ôl yr hyn maen nhw eisiau ei wneud, yna rwy'n teimlo fel byddwn wedi cyflawni'r hyn roeddwn i eisiau ei wneud gyda'r prosiect hwn.

“Rwy'n credu ei bod hi'n bwysig iawn ysbrydoli'r genhedlaeth nesaf a chefnogi breuddwydion a gwneud i bobl gredu ei bod hi'n bosibl cael gyrfa mewn rhywbeth rydych chi am ei wneud - fel i fi, ffotograffiaeth oedd hynny.”

Ychwanegodd: “Rwy'n credu bod angen i gelf fod yn hygyrch ac rwy'n credu y dylai fod yn hawdd mynd ati i bob un o'r gymuned.

“Rwy'n credu bod gofod fel yr Oriel Gelf Ganolog yng nghanol y dref, oedd y lle iawn ac roedd ganddo'r egni cywir.”

Creu Gofod ar gyfer Lleisiau Newydd

Adlewyrchir yr ymrwymiad hwnnw i hygyrchedd ac ysbrydoliaeth yn un o elfennau mwyaf pwerus yr arddangosfa - arddangosfa bwrpasol o waith gan fyfyrwyr o Goleg Caerdydd a'r Fro - lle dechreuodd Lloyd ei hun ei daith artistig gyntaf.

“Roeddgweithio gyda'r myfyrwr yn anhygoel.

“Eisteddais gyda nhw a'u mentora dros ychydig wythnosau ac fe aethon nhw i ffwrdd a thynnu lluniau eu hunain i'r un teitl — Otrovert - ac rydw i wedi gallu cynnwys eu gwaith yn y sioe.

“Rwy'n credu bod yr eiliadau hynny, gallu teimlo fel bod nhw’n cael eu gweld neu gydnabod yn yr oedran hwnnw mor bwysig oherwydd gall fod yn amser dryslyd a gallwch deimlo llawer o bwysau i fynd i gyfeiriad penodol neu efallai nad ydych chi'n teimlo bod hwn yn llwybr realistig.

“Ond unwaith eto, rwy'n dod o'r un cefndir a dyma lle dechreuais fy nhaith. Felly mae gallu dod yn ôl yno a dod â nhw i mewn wedi bod yn brofiad gwerth chweil iawn.”

Mae Otrovert hefyd yn tynnu sylw at rywbeth gwerth ei ddathlu fel sefydliad - y rôl mae ein mannau cyngor yn ei chwarae wrth alluogi cyfleoedd fel hyn.

Mae Oriel Gelf Ganolog, sydd wedi'i lleoli o fewn Llyfrgell y Barri, yn fwy na lleoliad yn unig. Mae'n ofod diwylliannol hygyrch, rhad ac am ddim wedi'i ymgorffori yn y gymuned — lle gall preswylwyr ddod ar draws gwaith o ansawdd uchel, lle gellir cefnogi artistiaid, a lle gall straeon fel Lloyd ddod yn gylch llawn.

Mae Otrovert yn rhedeg rhwng 20 Ebrill a 4 Gorffennaf 2026 yn Oriel Gelf Ganolog, Llyfrgell y Barri.

Oriau agor:

• Dydd Llun i ddydd Gwener: 9:30yb — 4:30yp
• Dydd Sadwrn: 9:30yb — 4:00yp