Tymor Newydd, Sgiliau Newydd: Ystyriwch Gyrfa mewn Gwaith Ieuenctid

Mae mis Medi yn aml yn teimlo fel amser ar gyfer dechrau newydd - blwyddyn ysgol newydd, cyfleoedd newydd a chyfle i feddwl am yr hyn a ddaw nesaf. 

Os ydych chi erioed wedi ystyried datblygu eich sgiliau, archwilio newid gyrfa neu wneud mwy i gefnogi pobl ifanc yn eich cymuned, gallai'r hydref hwn fod yn amser perffaith i ddechrau ar eich taith gwaith ieuenctid.

Mae Gwasanaeth Ieuenctid y Fro, mewn partneriaeth â Dysgu Oedolion Cymru, yn cynnig cymwysterau gwaith ieuenctid Lefel 2 a Lefel 3 sydd wedi'u cynllunio i roi'r wybodaeth, y sgiliau a'r hyder sydd eu hangen ar ymarferwyr i weithio'n effeithiol gyda phobl ifanc.

Dechreuwch eich taith gwaith ieuenctid

Mae Gwobr Lefel 2 mewn Egwyddorion Gwaith Ieuenctid yn rhoi cyflwyniad i egwyddorion hanfodol gwaith ieuenctid. Mae'n cwmpasu meysydd gan gynnwys:

• Ymgysylltu a chyfathrebu â phobl ifanc
• Egwyddorion gwaith ieuenctid
• Diogelu mewn lleoliad gwaith ieuenctid
• Datblygiad pobl ifanc

Mae'r cymhwyster wedi'i gynllunio i gefnogi pobl sy'n dechrau gwaith ieuenctid ac mae'n rhoi sylfaen gref ar gyfer symud ymlaen i Lefel 3.

I'r rhai sy'n barod i gymryd y cam nesaf, mae'r Dystysgrif Lefel 3 mewn Ymarfer Gwaith Ieuenctid yn datblygu'r sgiliau sydd eu hangen i arwain gwaith gyda phobl ifanc ar draws ystod o leoliadau gwaith ieuenctid. 

Mae'r ddau gymhwyster yn cyfuno sesiynau theori â dysgu ymarferol gan helpu dysgwyr i gysylltu'r hyn maen nhw'n ei ddysgu â'u profiad o weithio gyda phobl ifanc.

Cyfle dysgu i gydweithwyr

Mae gwaith ieuenctid yn ymwneud â mwy nag ennill cymhwyster - mae'n gyfle i ddatblygu sgiliau a all wneud gwahaniaeth gwirioneddol i bobl ifanc yn ein cymunedau.

I gydweithwyr sy'n ystyried newid gyrfa, yn chwilio am her newydd neu eisiau ehangu eu profiad, gallai'r cyrsiau hyn fod yn gam nesaf gwerthfawr yn eich datblygiad gyrfa.

Mae'r cwrs Lefel 2 yn dechrau ar 24 Medi 2026, gyda sesiynau'n cael eu cynnal ar nos Iau yn y Swyddfeydd Dinesig yn y Barri. Mae'r cwrs Lefel 3 yn dilyn ar 06 Hydref 2026, gyda sesiynau ar nos Fawrth yn yr un lleoliad.

Ble gallai arwain?

Gall cwblhau'r Lefel 2 ddarparu llwybr i mewn i'r Dystysgrif Lefel 3, tra bod cwblhau'r cymwysterau gwaith ieuenctid perthnasol hefyd yn cefnogi cofrestru gyda Chyngor y Gweithlu Addysg (CGA) Cymru fel Gweithiwr Cymorth Ieuenctid, yn unol â'r gofynion cyfreithiol ar gyfer ymarferwyr gwaith ieuenctid cymwys.

Felly, os yw’r Hydref wedi’ch ysgogi i feddwl am ddechreuadau newydd, datblygiad proffesiynol neu ble y gallai eich gyrfa fynd â chi nesaf, beth am archwilio a allai gwaith ieuenctid fod eich cam nesaf?

Am ragor o wybodaeth am y cyrsiau a sut i wneud cais, cysylltwch â Hannah Brown (hbrown@valeofglamorgan.gov.uk) neu Peter Williams (pjwilliams@valeofglamorgan.gov.uk).