Dweud Eich Dweud ar Hunanasesiad Blynyddol y Cyngor

27 Gorffennaf 2026

Mae Hunanasesiad Blynyddol y Cyngor (HByC) yn cael ei gynhyrchu ar hyn o bryd, gyda'r staff yn cael eu hannog i rannu eu barn fel rhan o'r broses honno.

Mae'r Hunanasesiad Blynyddol yn llawer mwy na gofyniad statudol. Mae'n un o adolygiadau mwyaf a mwyaf cynhwysfawr y Cyngor yn seiliedig ar dystiolaeth, gan ddod â gwybodaeth ynghyd gan bob cyfarwyddiaeth, maes gwasanaeth a rhaglen waith corfforaethol er mwyn deall pa mor dda mae'r Awdurdod yn cyflawni i drigolion, cymunedau a busnesau ledled y Fro.

Er mae’r gwaith – sy’n cael ei arwain gan Helen Moses a Julia Archampong yn yr adran Strategaeth Gorfforaethol a Mewnwelediad – yn bwysig, nid adroddiad gan un tîm yn unig yw hi.

Mae pob gweithiwr yn cyfrannu at yr Hunanasesiad Blynyddol drwy'r gwaith maen nhw'n ei wneud bob dydd, boed hynny'n darparu gwasanaethau rheng flaen, cefnogi cydweithwyr, rheoli prosiectau, ymgysylltu â thrigolion, monitro perfformiad neu helpu i wella sut mae'r Cyngor yn gweithredu.

Er bod yr adroddiad yn cael ei gyhoeddi'n flynyddol, mae'r broses hunanasesu yn digwydd drwy gydol y flwyddyn.

Casglir tystiolaeth yn barhaus o ystod eang o ffynonellau, gan gynnwys data perfformiad a risg, adborth preswylwyr, gwybodaeth ariannol, gwybodaeth am y gweithlu, gweithgarwch craffu, cwynion, ymarferion ymgysylltu, archwiliadau ac arolygiadau.

Mae pob cyfarwyddiaeth yn adolygu ei pherfformiad drwy gydol y flwyddyn cyn cynnal hunanasesiad diwedd blwyddyn manwl. Mae'r adolygiadau hyn yn ystyried yr hyn sydd wedi mynd yn dda, lle mae angen gwella, yr heriau a pha mor effeithiol y defnyddiwyd adnoddau.

Mae'r canfyddiadau hynny wedyn yn destun her gadarn gan uwch swyddogion, cynghorwyr, cadeiryddion craffu a staff o bob rhan o'r sefydliad er mwyn sicrhau bod casgliadau'n deg, yn gytbwys ac yn seiliedig ar dystiolaeth.

Ystyrir tystiolaeth annibynnol hefyd, gan gynnwys adroddiadau Archwilio Cymru, arolygiadau allanol, gwybodaeth meincnodi, canfyddiadau archwilio mewnol ac adborth gan drigolion a defnyddwyr gwasanaeth.

Yna mae proses gymedroli derfynol yn dod â phopeth at ei gilydd, gan gytuno ar asesiad cyffredinol o berfformiad y Cyngor, defnydd o adnoddau a threfniadau llywodraethu.

Mae'r adroddiad drafft ar gyfer 2025/26 yn tynnu sylw at nifer o gyflawniadau cadarnhaol ar draws pum Amcan Llesiant y Cyngor:

• Creu llefydd gwych i fyw, gweithio ac i ymweld.
• Parchu a dathlu'r amgylchedd.
• Rhoi dechrau da i bawb mewn bywyd.
• Cefnogi ac amddiffyn y rhai sydd ein hangen.
• Bod y Cyngor gorau y gallwn fod.

Mae'r rhain yn cynnwys gwelliannau o ran darparu tai fforddiadwy, atal digartrefedd, perfformiad ailgylchu, presenoldeb mewn ysgolion, cymorth gofal cymdeithasol a gwasanaethau digidol.

Mae'r adroddiad hefyd yn cydnabod yr heriau sy'n parhau, gan gynnwys pwysau ariannol parhaus, galw cynyddol am wasanaethau a materion capasiti'r gweithlu mewn rhai meysydd.

Yn bwysicaf oll, mae'n dangos effaith gyfunol staff ar draws y Cyngor a'r cyfraniad y maent yn ei wneud bob dydd tuag at wella canlyniadau i drigolion.

Mae'r Hunanasesiad Blynyddol yn enghraifft gref o Amcan Lles y Cyngor i Fod y Cyngor Gorau y Gallwn Fod.

Mae'r broses yn annog myfyrio, herio, dysgu a gwelliant parhaus. Mae'n helpu i sicrhau bod penderfyniadau'n seiliedig ar dystiolaeth, bod adnoddau'n cael eu defnyddio'n effeithiol a bod gwasanaethau'n parhau i esblygu i ddiwallu anghenion ein cymunedau.

Mae hefyd yn dangos pwysigrwydd cydweithio, gan ddod â staff, rheolwyr, aelodau etholedig, partneriaid a thrigolion ynghyd i ddatblygu dealltwriaeth o'n llwyddiannau a'r meysydd lle mae angen i ni wella.

Cyn i'r adroddiad gael ei gwblhau, caiff ei rannu gyda staff, aelodau etholedig, trigolion, partneriaid, busnesau lleol a rhanddeiliaid eraill i gasglu eu hadborth.

Dywedodd Helen Moses, Rheolwr Gweithredol Strategaeth Gorfforaethol a Mewnwelediad: “Mae gan staff safbwynt unigryw ar sut mae gwasanaethau'n perfformio a'r heriau a'r cyfleoedd sy'n wynebu'r sefydliad. 

“Mae'r adborth a dderbynnir drwy'r ymgynghoriad yn helpu i sicrhau bod yr adroddiad terfynol yn onest, yn gytbwys ac yn adlewyrchu realiti gweithio o fewn y Cyngor.

“Os ydych chi'n cytuno â'r canfyddiadau, os oes gennych awgrymiadau ar gyfer gwella neu'n teimlo bod rhywbeth pwysig ar goll, rydyn ni eisiau clywed gennych chi.”

Gellir rhannu safbwyntiau trwy gwblhau'r arolwg byr hwn.