Taith 280km Chelsie: Cerdded y Camino de Santiago

10 Tachwedd 2025

Cwblhaodd Chelsie-Louisa Webber o'r tîm Cofrestru Etholiadol gamp bersonol anhygoel yn ddiweddar - sef cerdded y Camino de Santiago byd-enwog, llwybr pererindod sydd wedi ysbrydoli teithwyr ers canrifoedd.

Gan ddechrau o Porto ar 26 Medi, dilynodd Chelsie y Llwybr Arfordirol, gan olrhain traethlin yr Iwerydd trwy drefi glan môr swynol a phentrefi pysgota, cyn cyrraedd ei chyrchfan olaf -  Santiago - ar 10 Hydref. Yn gyfan gwbl, cerddodd 280 cilomedr trawiadol ar droed.

Wrth fyfyrio ar ei phrofiad, rhannodd Chelsie: “Mae'r Camino de Santiago yn daith bererin sydd â tharddiad crefyddol, ond yn agored i unrhyw un. Cwrddais â phobl o bob cwr o'r byd — o Ogledd America, De America, Asia ac Ewrop. Y rhan orau oedd casglu stampiau pererin ar hyd y ffordd, pob un yn unigryw ac yn brawf o'ch taith.”

Ar hyd y llwybr, daeth Chelsie ar draws wynebau cyfeillgar a'r cyfarchiad enwog  - “Bom Camino” - ymadrodd a gyfnewidiwyd gan gyd-gerddwyr a phobl leol fel ei gilydd, gan ddymuno taith dda i'w gilydd.

Un o uchafbwyntiau ei hantur oedd ymweld â Baiona, tref arfordirol hardd sy'n llawn hanes a chymeriad.

“Baiona - sy'n dref glan môr fawr - oedd fy hoff arhosfan, gyda chastell a chaer wedi eu hadeiladu yn y 12fed ganrif sy'n edrych dros y dref ar un ochr, a'r môr ar y llall,” esboniodd Chelsie. 

“Fe wnes i fwynhau'r bwyd Galisaidd a dysgu mwy am ddiwylliant Galisaidd a'i gysylltiad cryf â thraddodiadau Celtaidd.”

Disgrifir y Camino yn aml fel mwy na dim ond taith gerdded - mae'n daith o fyfyrio a her bersonol - am gyflawniad gwych Chelsie!