Yr Wythnos Gyda Rob

11 Chwefror 2022

Annwyl gydweithwyr,  

Gobeithio bod popeth yn iawn ar ddiwedd wythnos brysur arall.

Yr wythnos diwethaf, defnyddiais fy neges i dynnu sylw at y cynlluniau i nodi Wythnos Cydraddoldeb Hiliol yn y sefydliad. Fel rhan o hyn, ddydd Mercher cymerais ran mewn sesiwn Man Diogel gyda'n rhwydwaith Amrywiol. Dyma'r sesiwn gyntaf o’r fath i mi ac roedd yn bwerus ac yn ysgogi'r meddwl. Cafodd cydweithwyr yr UDA a minnau drafodaethau craff iawn gyda chynrychiolwyr y rhwydwaith, a ymunodd â ni'n bersonol yn siambr y Cyngor ac yn rhithiwr drwy Teams. Dim ond y man cychwyn yw geiriau wrth gwrs ac er fy mod yn credu ein bod eisoes yn gwneud gwaith gwych i wneud Bro Morgannwg yn Gyngor cynhwysol mae mwy y gellir ei wneud bob amser ac rwyf wedi dweud wrth y grŵp y bydd camau pellach yn dilyn.  

Hoffwn ddiolch eto yn gyhoeddus i bawb a wnaeth y sesiwn mor fuddiol. Ochr yn ochr â GLAM, mae'r rhwydwaith Amrywiol yn rhoi llais pwerus iawn i'w cydweithwyr. Cyn bo hir, bydd y grwpiau hyn yn gweithio gyda rhwydwaith staff materion anabledd newydd i sicrhau y gellir clywed barn hyd yn oed mwy o gydweithwyr. Byddwn yn rhannu mwy o fanylion am nodau'r grŵp newydd, ei gyfarfod cyntaf, ac yn bwysicaf oll sut y gallwch gymryd rhan ar StaffNet yn fuan.

Gan gyfeirio’n ôl i'r wythnos diwethaf, efallai eich bod yn cofio fy mod wedi tynnu sylw at waith cydweithwyr yn ein tîm Cyllid wrth weinyddu Cynllun Cymorth Tanwydd y Gaeaf. Ers hynny, rwyf wedi cael cyfle i siarad â Paul Russell ein Rheolwr Gweithredol ar gyfer Gwasanaethau'r Trysorlys. Esboniodd Paul i mi faint o waith roedd y tîm yn ei wneud.  Gan weithio'n agos gyda thimau eraill o fewn yr adran Gyllid, darparodd Gwasanaethau’r Trysorlys dros £42m o grantiau busnes ardrethi annomestig yn 2020/21 ac £1.6m arall yn ystod yr wythnosau diwethaf.  Mae'r gwaith hwn wedi rhoi cymorth ariannol i fusnesau sy'n cyflogi miloedd o drigolion y Fro.  Yn ogystal â'r £600,000 o Gymorth Tanwydd y Gaeaf, mae taliadau hunanynysu gwerth cyfanswm o £760,000 wedi'u talu i fwy na 3000 o drigolion lleol. 

Bydd pob ceiniog o hyn wedi mynd i gefnogi pobl yn ystod y pandemig ac wedi gwneud gwahaniaeth gwirioneddol i'w bywydau. Pan soniwn am ein gwaith i gefnogi'r bobl fwyaf agored i niwed yn ein cymunedau, efallai nad gwaith y tu ôl i'r llenni timau fel Gwasanaethau'r Trysorlys yw'r hyn sy'n dod i’r meddwl gyntaf, ond mae ei effaith yr un mor fawr. Gwn fod y tîm wedi dangos ymrwymiad enfawr i gyflawni'r mentrau newydd hyn, ac fel cynifer ohonom, daethant o hyd i ffyrdd o'i wneud tra hefyd yn rheoli eu llwyth gwaith blaenorol. Diolch yn fawr bawb. Rydym yn cydnabod ac yn gwerthfawrogi eich gwaith.  

Roeddwn hefyd yn falch bod Rachael Slee, Rheolwr Cyfleusterau'r Cyngor, wedi cysylltu â mi’n ddiweddar.  Roedd Rachael yn awyddus i ganmol ein staff Glanhau a Diogelwch gan eu disgrifio fel rhai o 'arwyr di-glod ein sefydliad'.  Gwn fod yr holl staff yn y timau Glanhau a Diogelwch wedi gweithio'n eithriadol o galed i sicrhau bod yr holl staff ac ymwelwyr â'n hadeiladau wedi cael gweithle diogel.  Maent wedi gweithio oriau ychwanegol i sicrhau bod y risg o haint mor isel â phosibl, yn ogystal â meithrin sgiliau newydd megis defnyddio'r peiriannau bio-niwlio mewn ardaloedd â nifer o achosion.  Maent hefyd wedi bod yn gyflym i ymateb mewn argyfwng ac wedi ymgymryd â rolau na fyddant efallai'n eu gwneud yn 'arferol'.  

Ychydig o Gynghorau sydd wedi cadw adeiladau, swyddfeydd a derbynfeydd ar agor drwy gydol y pandemig, ond rydym wedi bod yn un o'r ychydig sydd wedi gwneud hynny. Diolch, a rhaid i ni hefyd ddangos ein gwerthfawrogiad i'n timau Glanhau a Diogelwch – mae eu hymdrechion wedi sicrhau bod yr adeiladau wedi gallu aros yn agored, yn ddiogel ac yn lân ac rydym yn cydnabod ac yn gwerthfawrogi eu gwaith diflino nhw hefyd.   Diolch yn fawr Rachael am gysylltu â mi a diolch yn fawr i'n holl staff glanhau a diogelwch.  

I unrhyw un sydd allan yn mwynhau'r Fro y penwythnos hwn - yn enwedig os ydych chi'n mynd ar eich beic - cadwch lygad am y gorsafoedd trwsio beiciau newydd o amgylch y Fro. Maent wedi cael croeso da iawn gan drigolion, ar ôl cael eu gosod yr wythnos hon diolch i bartneriaeth rhwng ein tîm Gwasanaethau Cymdogaeth a Thrafnidiaeth ac Iechyd Cyhoeddus Cymru. Bydd y gorsafoedd yn chwarae rhan fawr yn ein helpu i gyflawni ein huchelgeisiau teithio llesol ar gyfer y Fro drwy ei gwneud yn haws fyth i bobl feicio'n hyderus. Yn ystod yr wythnos y mae ein baneri Prosiect Sero newydd yn cael eu cyflwyno i gydnabod prosiectau a fydd yn ein helpu i gyrraedd sero net erbyn 2030, mae'n wych gallu rhannu'r cymorth ymarferol iawn hwn i'r rhai sy'n ein helpu i fynd i'r afael â newid yn yr hinsawdd.  Gallwch ddod o hyd i restr lawn o leoliadau ar ein gwefan. 

O ran mater penodol Covid-19, bydd llawer ohonoch eisoes wedi gweld, ac rwy’n siŵr, wedi croesawu, y cyhoeddiad ymlaen llaw gan Lywodraeth Cymru heddiw, cyn belled â bod y tueddiadau presennol yn parhau, y bydd y gofyniad i wisgo gorchudd wyneb mewn llawer o fannau cyhoeddus yn cael ei ddirymu o 28 Chwefror. O ran beth mae hyn yn ei olygu i'n gweithleoedd, hoffwn eich sicrhau bod ein tîm Iechyd, Diogelwch a Lles yn adolygu'r canllawiau newydd ar hyn o bryd a byddwn yn diweddaru staff cyn gynted â phosibl. Tan hynny, parhewch i ddilyn y canllawiau ar StaffNet+. 

Yn ystod yr wythnosau nesaf, byddaf hefyd yn rhoi'r wybodaeth ddiweddaraf i chi am y gwaith sydd ar y gweill i gynllunio’r dyfodol o ran sut rydym yn defnyddio ein swyddfeydd fel rhan o brosiect Eich Lle – Your Space. Rwy'n edrych ymlaen at drafodaeth yng nghyfarfod yr UDA ar ôl hanner tymor i edrych ar yr opsiynau y mae’r tîm prosiect wedi bod yn gweithio arnynt yn seiliedig ar y wybodaeth a ddarparwyd gan gydweithwyr o bob rhan o'r Cyngor.  Diolch fel bob amser am eich ymdrechion yr wythnos hon a mwynhewch y penwythnos, beth bynnag a wnewch.

Diolch yn fawr i chi gyd.

Rob.