Arweinydd y Cyngor yn cyhoeddi neges cyn y digwyddiadau sydd ar y gweill
Mae Neil Moore, Arweinydd Cyngor Bro Morgannwg, wedi atgoffa trigolion o'r angen i gadw at gyfyngiadau’r cyfnod atal wrth i ni fynd at driawd o ddigwyddiadau a fyddai fel arfer yn cynnwys y cyhoedd yn ymgynnull.
Calan Gaeaf fydd ddydd Sadwrn, Noson Tân Gwyllt bum diwrnod yn ddiweddaraf a Dydd y Cofio ar 11 Tachwedd.
Eleni, ni chaniateir y cymdeithasu arferol sy'n cyd-fynd â'r achlysuron hyn, ond mae nifer o ffyrdd eraill y gellir eu nodi.
Gan na chaniateir cwrdd ag aelwydydd eraill dan do nac yn yr awyr agored, ni ellir cynnal losin neu lanast.
Fodd bynnag, mae'n bosibl trefnu helfa drysor Calan Gaeaf yn eich cartref fel dewis arall, tra gall partïon traddodiadol gael eu cynnal yn rhithiwr.
Gall defodau eraill megis cerfio pwmpenni, gwisgo i fyny, dweud straeon arswydus a dowcio am afalau ddigwydd dan do.
Ar gyfer Noson Tân Gwyllt, gall teuluoedd wneud afalau toffi gartref, cynnau fflachiau ysgafn yn ddiogel yn yr ardd gyda bwced o ddŵr gerllaw neu fynd allan am dro gyda'r nos yn yr hydref gydag aelodau o'u cartref.
Er mwyn atal pobl rhag ymgynnull, caiff holl barciau a gedwir a pharciau gwledig eu cau am 4pm ddydd Calan Gaeaf a Noson Tân Gwyllt.
Oherwydd y sefyllfa bresennol, bydd Maer Bro Morgannwg yn cynnal gwasanaeth cofio bach drwy wahoddiad yn unig ger Cofeb y Llynges Fasnachol yn y Swyddfeydd Dinesig yn Y Barri am 11am ddydd Mercher, 11 Tachwedd.
Yn anffodus ni fydd yn bosibl i’r Cyngor ymgynnull â sefydliadau, grwpiau nac aelodau o’r cyhoedd eleni.
Fodd bynnag, bydd y gwasanaeth gosod torchau yn cael ei ffrydio’n fyw ar wefan y Cyngor a’i dudalen Facebook i bawb sy’n dymuno ei wylio.
Gofynnir i drigolion sydd am dalu parch personol wneud hynny ar ôl 11:30am ar sail unigol yn unol â chyfyngiadau Llywodraeth Cymru.
Mae'r Lleng Brydeinig Frenhinol hefyd yn annog pobl i ddilyn Dydd y Cofio drwy ddarllediadau teledu ac i arsylwi'r distawrwydd o ddwy funud yn breifat.
I nodi'r achlysur ymhellach, caiff Lloches y Gorllewin a thwnnel Hood Road yn Y Barri eu goleuo mewn coch, lliw'r pabi.
Dywedodd y Cynghorydd Neil Moore, Arweinydd Cyngor Bro Morgannwg: "Ddiwedd yr wythnos diwethaf, siaradais â chi am bwysigrwydd arsylwi cyfyngiadau cyfnod atal Llywodraeth Cymru wrth i ni wneud cais i gael gwell rheolaeth dros y coronafeirws.
"Roedd trosglwyddo Covid-19 wedi arafu yn y Fro diolch i'n hymdrechion, ond yn anffodus mae wedi codi eto'n ddiweddar. Cofiwch nad yw'r clefyd wedi diflannu ac un o'r ffyrdd hawsaf iddo ledaenu yw pan fo pobl yn ymgynnull a chyfarfod ag eraill nad ydynt yn byw gyda chi.
"Mae hynny'n golygu, yn anffodus, na all y digwyddiadau cymdeithasol y deuwn at ei gilydd ar eu cyfer ar yr adeg hon o'r flwyddyn fynd rhagddynt fel arfer.
"Dw i'n gwybod bod peidio â gweld teulu a ffrindiau ar achlysuron o'r fath yn anodd ac rwy'n gwerthfawrogi ein bod wedi bod yn aberthu ers amser maith bellach.
"Fodd bynnag, mae'n hanfodol bod pawb yn parhau i gadw at y cyfyngiadau sydd ar waith ac yn helpu i drechu’r clefyd ofnadwy hwn.
"Er na fydd dathliadau a choffáu yr un fath, mae amrywiaeth o ffyrdd o hyd y gellir eu nodi.
"Mwynhewch yr ŵyl gydag aelodau o'ch cartref ond gwnewch hynny'n ddiogel. Bydd hynny'n ein helpu i ddiogelu'r GIG ac aelodau mwyaf agored i niwed ein cymunedau."