Partneriaid Bwrdd Gwasanaethau Cyhoeddus yn lansio siarter Argyfwng Hinsawdd
Mae partneriaid Bwrdd Gwasanaethau Cyhoeddus Bro Morgannwg (BGC) wedi lansio Siarter newydd sy'n rhoi manylion am eu hymrwymiad i fynd i'r afael â'r Argyfwng Hinsawdd gyda'i gilydd.
Mae'r Siarter yn adeiladu ar y camau a gymerwyd eisoes i ddiogelu a gwella amgylchedd y Fro ers y datganiad Argyfwng Hinsawdd yn 2019.
Mae'n nodi cyfres o gamau gweithredu allweddol ar gyfer partneriaid y BGC, yn eu sefydliadau eu hunain ac i weithredu mewn partneriaeth, gyda'r nod o reoli a chyfyngu ar effeithiau newid yn yr hinsawdd:
- Lleihau allyriadau i liniaru effeithiau newid yn yr hinsawdd gan addasu i'w effeithiau.
- Bod yn fwy caredig wrth ein hamgylchedd.
- Bod yn iachach.
- Dod yn Sector Cyhoeddus Carbon Niwtral erbyn 2030.
Mae'r Siarter wedi'i llywio gan waith ymgysylltu a wnaed gyda phobl ifanc o bob rhan o’r Fro ac mae wedi ceisio adlewyrchu’r adborth hwn.
Bydd Grŵp Llywio'r Siarter Newid yn yr Hinsawdd yn arwain y prosiect, gan sicrhau bod y camau gweithredu a nodir yn cael eu cyflawni, gydag adroddiadau cynnydd rheolaidd i'r BGC. Mae enghreifftiau o'r gwaith arfaethedig yn cynnwys:- Cynlluniau gan Gyngor Bro Morgannwg i agor yr ysgolion carbon net-sero cyntaf yng Nghymru.
- Gweithio gan Cyfoeth Naturiol Cymru i leihau allyriadau yn ei gadwyni cyflenwi drwy wella arferion caffael.
- Plannu coed mewn ysgolion ac ar dir arall sy'n eiddo i bartneriaid y BGC.
- Gwella adeiladau gan bartneriaid y BGC i gynyddu effeithlonrwydd ynni.
Dywedodd y Cyng. Neil Moore, Arweinydd Cyngor Bro Morgannwg a Chadeirydd Bwrdd Gwasanaethau Cyhoeddus Bro Morgannwg: "Mae lansio Siarter Argyfwng Hinsawdd y BGC yn gam enfawr ymlaen yn ein brwydr yn erbyn newid yn yr hinsawdd.
"Mae ymateb y Fro i bandemig y coronafeirws dros y 10 mis diwethaf wedi pwysleisio faint y gellir ei gyflawni pan fo sefydliadau'n gweithio gyda'i gilydd. Rhaid i ni barhau i adeiladu ar yr hyn rydym wedi'i ddysgu a'i ddefnyddio yng nghyd-destun yr angen dybryd i fynd i'r afael â newid yn yr hinsawdd.
"Drwy gyflawni'r camau hyn a thrwy ein gwaith partneriaeth parhaus, gallwn gael effaith barhaol ar yr Argyfwng Hinsawdd er mwyn sicrhau y caiff cenedlaethau'r dyfodol barhau i fwynhau ein hamgylcheddau naturiol."
Dywedodd Nadia De Longhi, Rheolwr Gweithrediadau Cyfoeth Naturiol Cymru: "Mae trawsnewid y ffordd rydyn ni i gyd yn byw ein bywydau yn hanfodol os yw Cymru eisiau mynd i'r afael â'r argyfyngau hinsawdd a natur y mae'n eu hwynebu."
Mae ein Hadroddiad ar Gyflwr Cyfoeth Naturiol a lansiwyd yn ddiweddar yn tynnu sylw at effeithiau presennol newid yn yr hinsawdd er mwyn ennyn cefnogaeth ar gyfer datgarboneiddio cyflym.
"Mae'r Siarter hon yn gyfle i nodi'r hyn y gall pob partner y BGC weithio arno i liniaru ac addasu i newid yn yr hinsawdd, rhannu arfer da ac ysbrydoli ei gilydd.
"Mae llawer o feysydd lle gallwn ni, fel BGC y Fro, arwain drwy esiampl i leihau ein hallyriadau a chymryd camau cadarnhaol i fynd i'r afael â'r argyfyngau hinsawdd a natur"
Dywedodd Mark Brace, Comisiynydd Cynorthwyol Comisiynydd Heddlu a Throseddu, De Cymru ac Is-gadeirydd y Bwrdd Gwasanaethau Cyhoeddus: "Mae'r Siarter Argyfwng Hinsawdd yn dangos ymrwymiad clir gan y BGC i gydweithio a chwarae ein rhan wrth fynd i'r afael ag un o heriau mwyaf ein cyfnod. Mae'n nodi ein huchelgais i arwain drwy esiampl a chydweithio i newid y ffordd rydym yn gweithio ac yn byw, gan sicrhau gwahaniaeth cynaliadwy yng nghymunedau a sefydliadau ar draws Bro Morgannwg."
Mae Siarter Argyfwng Hinsawdd BGC Bro Morgannwg ar gael ar wefan y BGC a bydd adroddiadau rheolaidd ar y cynnydd.
Siarter Argyfwng Hinsawdd