Twyll fasnachwyr yn cael eu herlyn gan y Cyngor
Mae dau frawd wedi eu danfon i'r carchar am geisio camfanteisio ar ddau ddyn oedrannus o'r Bont-faen yn dilyn erlyniad llwyddiannus gan Gyngor Bro Morgannwg.
Cafwyd Bernard a Martin Mongan yn euog ar ddau achos o gymryd rhan mewn arfer masnachol a oedd yn ymosodol ar ôl ymchwiliad gan y Gwasanaethau Rheoliadol a Rennir (GRhR).
Mae'r GRhR yn cynnal safonau masnach a swyddogaethau eraill ar gyfer ardaloedd awdurdod lleol y Fro, Pen-y-bont a Chaerdydd.
Yn ystod y cyfnod clo, sefydlodd y teulu Mongan, sy'n dod o Leighton Buzzard, gwmni o'r enw Prestige Driveways and Roofs Limited. Defnyddion nhw gyfeiriad ffug i'r cwmni a'u lleoli eu hunain yng Nghasnewydd.
O fewn dyddiau roedden nhw wedi mynd at y dioddefwyr, yn eu 80au, ac wedi cytuno i ymgymryd â dau ddarn o waith, un ar dramwyfa ac un arall ar do.
Gofynnodd y brodyr am dair gwaith y ffi y cytunwyd arni’n flaenorol am y gwaith, oedd heb ei orffen ac a wnaed i safon wael.
Pan wrthododd y dioddefwyr dalu'r pris chwyddedig, cawsant eu bygwth.
Cafodd y mater ei adrodd i'r Heddlu ac yna fe gyfeiriwyd at GRhR i weithredu.
Cafodd y ddau ddiffynnydd eu dedfrydu i 12 mis o garchar am bob trosedd i gydredeg.
Cawsant ostyngiad am bledio'n euog, sy'n golygu y bydd y brodyr yn y carchar am naw mis, hanner ohono y tu ôl i fariau.
Cafodd y brodyr Mongan hefyd orchymyn i dalu gordal dioddefwr o fewn tri mis i adael y ddalfa.
Wrth ddedfrydu, dywedodd y Barnwr Jeremy Jenkins: "Cafodd y dioddefwyr yn yr achos hwn alwad digroeso am waith a gafodd ei hawlio gan y diffynyddion yn ôl yr angen.
"Fe godoch chi'r pris mewn proses tair haen fwriadol a ffug. Wrth gael eich herio gan y dioddefwyr fe wnaethoch chi eu bwlio a gwneud iddyn nhw deimlo'n ofnus. Roedd ofn gwirioneddol yn cael ei deimlo gan y dioddefwyr. Rydych wedi gofyn am drugaredd yn yr achos hwn, ond nid oeddech yn meddwl am effeithiau eich gweithredoedd mewn perthynas â'r dioddefwyr. Mae'r achos hwn yn amlwg wedi pasio'r trothwy i garcharu. Rwyf wedi ystyried eich ple euog cynnar ond rwyf hefyd wedi ystyried oedran y dioddefwyr yn yr achos hwn."
Dywedodd y Cynghorydd Ruba Sivagnanam, Aelod Cabinet Cyngor Bro Morgannwg ar faterion Ymgysylltu â'r Gymuned, Cydraddoldeb a Gwasanaethau Rheoleiddiol: "Roedd y dioddefwyr yma wedi'u targedu'n benodol oherwydd eu hoedran gan bobl a deithiodd yn bell i gyflawni'r troseddau.
"Mae ymddygiad o'r fath yn gwbl annerbyniol, ac rwy'n gobeithio bod yr erlyniad yma'n anfon neges na fydd yn cael ei oddef yn y Fro.
"Hoffwn ddiolch i swyddogion yr GRhR am eu gwaith diwyd a rhybuddiwn unrhyw un sy'n ystyried cyflawni troseddau tebyg na fyddwn yn oedi cyn gweithredu yn eu herbyn.
"Byddwn yn cynghori trigolion i gael dyfynbris ysgrifenedig clir wrth gael gwaith adeiladu wedi ei wneud. Dylai pobl hefyd fod yn ymwybodol bod y gyfraith yn caniatáu i berson ganslo contractau a wnaed yn eu cartref.
"Mae'n ddoeth cymryd amser a gofal wrth ddewis masnachwyr a gofyn am samplau o'u gwaith. Yn ddelfrydol, dylai'r person sy'n cael ei ddewis fod yn rhan o gymdeithas broffesiynol berthnasol hefyd."
Am ragor o wybodaeth am y pwnc hwn, cysylltwch â Chyngor ar Bopeth.