Datganiad ar y cyd gan Ysgol Gynradd Fairfield a Chyngor Bro Morgannwg
Mae hyn yn dilyn cyhoeddiad adroddiad Estyn yr ysgol.
“Mae'r Cyngor ac Ysgol Gynradd Fairfield wedi adolygu adroddiad Estyn yn dilyn yr arolygiad diweddar o'r ysgol.
“Mae'n hynod brin i ysgol yn y Fro gael ei chategoreiddio fel bod angen gwelliant sylweddol, gyda'r mwyafrif helaeth yn cwrdd ac yn aml yn rhagori ar safonau a dderbynnir.
“Cafodd rhai nodweddion addysgu yn Fairfield eu canmol gan aseswyr, ond roedd meysydd hefyd lle roedd perfformiad yn brin.
“Nododd yr arolygwyr fod yr ysgol yn gyfeillgar ac yn gynhwysol a bod disgyblion yn teimlo'n hapus ac yn cael eu gwerthfawrogi. Roedd yr adroddiad hefyd yn cydnabod bod bron pob disgybl yn dangos parch tuag at eraill, yn ymddwyn yn dda ac yn dangos agweddau cadarnhaol at eu dysgu. Amlygir y ffaith bod disgyblion yn cael cyfleoedd i ddatblygu sgiliau arwain, tra bod llawer yn ddarllenwyr galluog sy'n cyfleu eu barn a'u syniadau trwy leferydd ac ysgrifennu'n effeithiol. Sylwad arall oedd bod staff wedi ymrwymo i sicrhau cynnydd a lles pob disgybl ac mae llawer o athrawon wedi elwa o ddysgu proffesiynol, sy'n effeithio'n gadarnhaol ar eu gallu i gynnal cynnydd.
“Fodd bynnag, roedd meysydd clir i gael sylw a arweiniodd at argymhellion i wella arweinyddiaeth ac addysgu'r ysgol, i ddatblygu cwricwlwm cliriach a chodi safonau'r Gymraeg.
“Mae ymdrechion i fynd i'r afael â'r materion hyn eisoes wedi dechrau gyda Phennaeth Gweithredol Dros Dro newydd yn ei le a Phennaeth Ysgol Dros Dro newydd i'w benodi cyn bo hir.
“Mae Cynllun Gweithredu Ôl-Arolygu cynhwysfawr hefyd wedi'i lunio, a fydd yn arwain gwaith dros y misoedd nesaf i sicrhau cynnydd cyflym a pharhaus.
“Mae'r Corff Llywodraethol wedi gweithio'n agos gyda'r Awdurdod Lleol i wneud y newidiadau pendant cyflym hyn, ac mae'r ddau yn hyderus y byddant yn cael effaith gadarnhaol sylweddol.
“Bydd y Pennaeth Gweithredol Dros Dro newydd yn gweithio gyda Thîm Arweinyddiaeth yr ysgol a chorff staff ehangach i sbarduno gwelliant yn y meysydd sydd ei angen.
“Mae pawb yn credu'n gryf y bydd hyn yn cael yr effaith a ddymunir ac yn helpu Fairfield i gyrraedd safonau uchel ysgolion eraill yn y Fro."