Ymgyrch Biniau i Fechgyn i Wella Hygyrchedd Toiledau Cyhoeddus ar draws y Fro
Mae ymgyrch newydd sydd â'r nod o wella hygyrchedd a chynhwysoldeb mewn cyfleusterau cyhoeddus yn cael ei lansio ledled Bro Morgannwg.
Bydd y fenter 'Biniau i Fechgyn' yn gweld cyflwyno biniau hylendid mewn toiledau cyhoeddus i ddynion, gan gefnogi'r rhai sy'n byw gydag anymataliaeth a chyflyrau iechyd eraill.
Mae'r ymgyrch wedi cael ei hyrwyddo gan yr elusen CHILL — Cancer Help In Local Lives — sy'n cefnogi pobl sy'n byw gyda chanser ledled Cymru gyfan.
Mae'r fenter wedi'i gyrru'n rhannol gan yr ymgyrchydd lleol Ed Grant, aelod o CHILL ym Mro Morgannwg, ac roedd ei brofiad personol yn dilyn triniaeth canser y prostad yn amlygu bwlch sylweddol mewn cyfleusterau cyhoeddus.
Dywedodd Ed Grant: “Cefais ddiagnosis o ganser y prostad bum mlynedd yn ôl. Er bod canlyniad fy nhriniaeth yn ffafriol, gadawodd nifer o sgîl-effeithiau imi, gan gynnwys anymataliaeth wrinol. Yn aml roedd yn rhaid i mi newid padiau mewn toiledau dynion ac yn wynebu'r embaras a'r cywilydd o geisio dod o hyd i rywle i'w gwaredu. Os oedd fy ngwraig gyda fi, gallwn ofyn iddi fynd â nhw i mewn i'r toiledau merched, ond fel arall cefais fy ngadael yn gorfod defnyddio biniau cyhoeddus.
“Ar ôl ymuno â grŵp cefnogaeth canser, CHILL, sy'n darparu lle i bobl sydd wedi'u heffeithio gan ganser drafod eu profiadau yn agored, codais y mater hwn. Holais pam ei bod yn ofyniad statudol i doiledau menywod gael biniau misglwyf, tra nad yw toiledau dynion yn gwneud hynny. Arweiniodd y sgwrs honno at ddechrau fy ymgyrch, 'Biniau i Fechgyn'.
“Ar ôl i CHILL dderbyn gwobr gan Faer Pen-y-bont ar Ogwr, cefais gyfle i drafod yr ymgyrch ymhellach, a arweiniodd at wneud cysylltiad â Chyngor y Fro ac rwy'n hynod ddiolchgar ac yn ostyngedig eu bod wedi ymgymryd â'r dasg o ddarparu 'Biniau i Fechgyn'. Bydd y fenter hon yn cefnogi'r miloedd o bobl sydd angen mynediad at gyfleusterau priodol.”
Dywedodd Colin Smith, Pennaeth Gwasanaethau Cymdogaeth Cyngor Bro Morgannwg: “Rydym yn falch o gefnogi'r ymgyrch 'Biniau i Fechgyn' ac rydym yn gweithio mewn partneriaeth â CHILL i gyflawni'r gwelliant pwysig hwn i gyfleusterau cyhoeddus.
“Er bod biniau ar gael yn nhoiledau menywod, mae dynion sy'n delio ag anymataliaeth - boed hynny oherwydd triniaeth canser, cyflyrau meddygol, neu oedran - yn hanesyddol heb fynediad at opsiynau gwaredu priodol. Gall hyn arwain at anghysur, embaras, ac arwahanrwydd cymdeithasol.
“Bydd y fenter hon yn helpu i sicrhau bod ein toiledau cyhoeddus yn fwy cynhwysol a hygyrch i bawb, tra'n cefnogi urddas a lles trigolion ac ymwelwyr ar draws y Fro.”