Dyfarnu dros £500,000 i Barhau â Gwaith Adfer Natur
Dyfarnwyd £574,850 i Gyngor Bro Morgannwg i lansio ail gam newydd a chyffrous o brosiect Adfer y Ddawan sydd wedi bod o fudd i fywyd gwyllt, tirfeddianwyr a chymunedau dros y tair blynedd diwethaf.
Gan adeiladu ar lwyddiant y cam cyntaf, bydd y prosiect yn gweithio ochr yn ochr ag ystod eang o bartneriaid presennol a phartneriaid newydd i sicrhau adferiad natur ar raddfa ar draws dalgylch yr Afon Ddawan.
Bydd amrywiaeth eang o welliannau bioamrywiaeth yn cael eu darparu ar hyd yr Afon Ddawan, ei llednentydd a'r tirweddau cyfagos. Mae'r gwaith a gynlluniwyd yn cynnwys creu a gwella pyllau a gwlyptiroedd, adfer cynefinoedd afonydd a gorlifdiroedd, gwella amodau ar gyfer rhywogaethau fel llygod dŵr, a monitro bywyd gwyllt gan gynnwys afancod.
Bydd y prosiect hefyd yn canolbwyntio ar adfer glaswelltiroedd sy'n llawn rhywogaethau, creu a rheoli dolydd blodau gwyllt, plannu 20,000 o goed brodorol, adfer gwrychoedd a choetiroedd, a dechrau gwaith i nodi ac adfer ardaloedd o fawndir.
Dywedodd Mel Stewart, Rheolwr Prosiect Adfer y Ddawan: “Mae'r prosiect yn ymwneud â gwneud rhwydweithiau a chysylltiadau — ar gyfer bywyd gwyllt a phobl. Mae gennym gymaint o waith diddorol i edrych ymlaen ato, gan gynnwys plannu coed ac adfer dolydd blodau gwyllt a fydd o fudd i ystlumod a chwilod, hyd at welliannau afonydd a phyllau a fydd o fudd i lygod dŵr, dyfrgwn a thafonau.
“Rydym wedi bod yn gweithio gyda chymunedau lleol ledled y Fro, gan gynnwys grwpiau cymunedol, ysgolion, a thirfeddianwyr lleol, ac rydym yn awyddus i ehangu ar y gwaith hwn yn y cam nesaf cyffrous hwn.”
Bydd y prosiect yn parhau i gysylltu pobl â'r dirwedd drwy raglen gref o ymgysylltu cymunedol, gan gynnwys sesiynau ysgol, digwyddiadau cyhoeddus a chyfleoedd gwyddoniaeth dinasyddion. Ei nod yw ennyn diddordeb cannoedd o bobl leol, cefnogi partneriaethau newydd, a darparu hyfforddiant mewn sgiliau gwyrdd i wirfoddolwyr, tirfeddianwyr a ffermwyr.
Ariennir prosiect Adfer y Ddawan gan Gronfa Rhwydweithiau Natur, sy'n cael ei ddarparu gan Gronfa Treftadaeth y Loteri Genedlaethol yng Nghymru ac mewn partneriaeth â Chyfoeth Naturiol Cymru yn ogystal â Chyngor Bro Morgannwg ac Ymddiriedolaeth Coetir.
Nod Cronfa Rhwydweithiau Natur yw cryfhau gwydnwch safleoedd tir a morol gwarchodedig Cymru, cefnogi adferiad natur ac annog cymunedau i gymryd rhan mewn cadwraeth natur.
I'r rhai sydd â diddordeb mewn cefnogi'r prosiect - naill ai fel gwirfoddolwr, fel grŵp, neu'r rhai sydd wedi nodi prosiectau posibl y gallai fod angen cyllid arnynt (e.e. plannu gwrychoedd neu greu pyllau) - cysylltwch â Mel Stewart ar mjstewart@valeofglamorgan.gov.uk neu ewch i Adfer y Ddawan | Cymryd Rhan y Fro