Lle Creu y Fro yn Cefnogi Cymdeithas Wargames Lleol i Nodi 50 Mlynedd o Greadigrwydd Cymunedol
Mae grŵp hobi lleol hirsefydledig yn dathlu carreg filltir fawr fis Mai hwn, gyda chefnogaeth gwasanaeth arloesol y Lle Creu gyda Llyfrgelloedd Cyngor Bro Morgannwg.
Bydd Cymdeithas Wargames Penarth a'r Cylch, sydd wedi bod yn rhan o gymuned y Fro ers dros 50 mlynedd, yn nodi ei phen-blwydd ddydd Sadwrn 9 Mai.
Mae'r dathliad hefyd yn tynnu sylw at y rôl bwysig y mae cyfleusterau Lle Creu y Cyngor wedi'i chwarae wrth gefnogi gweithgareddau grŵpiau Wargames yn ystod y blynyddoedd diwethaf — yn Llyfrgelloedd Penarth a'r Barri.
Ers agor yn 2022, mae Lle Creu Llyfrgell Penarth wedi dod yn ganolbwynt rheolaidd i aelodau Cymdeithas Wargames Penarth a’r Cylch, a oedd ymhlith y cyntaf i wneud defnydd o'r cyfleuster.
Mae'r grŵp yn parhau i ddefnyddio offer arbenigol y gofod, gan gynnwys torwyr laser ac argraffwyr 3D, i ddylunio a chreu tir personol a ffigurau bach ar gyfer gemau pen bwrdd.
Mae'r berthynas wedi tyfu'n enghraifft gref o sut mae'r Cyngor yn parhau i gefnogi grwpiau lleol i ddatblygu, cydweithio a rhannu sgiliau gyda'r gymuned ehangach.
Gyda chefnogaeth barhaus cyfleusterau y Lle Creu mae aelodau o’r gymdeithas wedi cyflwyno cyfres o sesiynau gemau rhyngweithiol ar ben bwrdd i blant a theuluoedd yn ystod gwyliau'r ysgol.
Mae'r sesiynau hyn wedi cyfuno adrodd straeon, creadigrwydd a chwarae ymarferol, gan helpu i gyflwyno cynulleidfaoedd iau i hobïau newydd tra'n gwneud defnydd o amgylchedd y Lle Creu.
Mae gwasanaeth llyfrgell Cyngor Bro Morgannwg yn parhau i esblygu fel hybiau cymunedol deinamig, gan gynnig llawer mwy na benthyca llyfrau traddodiadol.
Mae gwasanaethau fel y Lle Creu yn darparu mynediad at offer modern, yn meithrin creadigrwydd, ac yn galluogi cydweithio rhwng grwpiau amrywiol i alluogi dysgu gydol oes a chysylltiad cymunedol.
Dywedodd Jordan Forse, Rheolwr Llyfrgelloedd a Gwasanaethau Diwylliannol: “Mae'n wych gweld sut mae ein cyfleusterau Lle Creu yn helpu grwpiau lleol fel Cymdeithas Wargames Penarth a'r Cylch i ffynnu.
“Mae cyrraedd 50 mlynedd yn gyflawniad rhyfeddol, ac mae eu brwdfrydedd parhaus yn tynnu sylw at werth parhaol creadigrwydd dan arweiniad y gymuned. Trwy fentrau fel hyn, rydym yn gallu darparu mannau lle gall pobl ddatblygu sgiliau newydd, rhannu eu harbenigedd a chysylltu ag eraill. Rydym yn falch o gefnogi prosiectau sy'n ysbrydoli dysgu, arloesi ac yn dod â phobl o bob oed at ei gilydd ar draws y Fro.”