Canmoliaeth i Ysgol Gymraeg Bro Morgannwg gan Arolygwyr Estyn
Mae Ysgol Gymraeg Bro Morgannwg wedi cael canmoliaeth gan Estyn am ei chymuned ofalgar a'i chwricwlwm cyfoethog yn dilyn arolygiad diweddar.
Canfu'r arolygwyr fod yr ysgol yn y Barri yn darparu ystod eang o brofiadau dysgu gwerthfawr, gyda disgyblion yn dangos agweddau cadarnhaol tuag at ddysgu ac yn ymfalchïo yn eu hunaniaeth Gymreig.
Nodwyd bod datblygu sgiliau siarad a gwrando disgyblion yn y Gymraeg yn gryfder allweddol, gan helpu dysgwyr i gyfathrebu'n hyderus a chefnogi eu cynnydd ar draws y cwricwlwm. Canmolodd yr arolygwyr hefyd ymagwedd gynhwysol yr ysgol, yn enwedig ei chefnogaeth i ddisgyblion ag anghenion dysgu ychwanegol, a chydnabod ei hymrwymiad i ddysgu proffesiynol a gwelliant parhaus.
Nododd yr arolygiad sawl enghraifft o arfer effeithiol, gan gynnwys gwaith yr ysgol i gyfoethogi sgiliau Cymraeg disgyblion a'i defnydd o brosiectau ymholi athrawon i wella addysgu a dysgu, ac o ganlyniad, mae Estyn wedi gwahodd yr ysgol i'w rhannu fel astudiaethau achos cenedlaethol.
Amlygodd yr adroddiad hefyd strategaeth gwrth-hiliaeth yr ysgol i ddatblygu darpariaeth cwricwlaidd: “Mae'r cwricwlwm yn dysgu disgyblion yn effeithiol am hanes a phrofiadau pobl o gefndiroedd Lleiafrifoedd Ethnig. Mae grŵp disgyblion lleiafrifoedd ethnig wedi cael dylanwad buddiol ar arweinyddiaeth a darpariaeth gwricwlaidd drwy godi ymwybyddiaeth staff o brofiadau bywyd go iawn disgyblion.
“Mae'r grŵp ffocws hwn wedi gwneud cyfraniad gwerthfawr at ddatblygu polisi gwrth-hiliaeth yr ysgol. Mae sesiynau datblygu proffesiynol a phrosiectau ymchwil i staff hefyd wedi rhoi cyfleoedd cadarn i staff ddyfnhau eu dealltwriaeth o wrthhiliaeth ac addasu'r ddarpariaeth cwricwlaidd o ganlyniad.”
Ychwanegodd arolygwyr: “Mae'r cwricwlwm yn cefnogi datblygiad creadigol a diwylliannol disgyblion yn bwrpasol. Gwneir hyn drwy sesiynau o fewn y celfyddydau perfformio a mynegiannol a thrwy gyfleoedd allgyrsiol gwerthfawr, megis aelodaeth o gorau, cystadlu mewn Eisteddfodau a pherfformio mewn cyngherddau a sioeau ysgol. Mae darpariaeth allgyrsiol eang yr ysgol yn gryfder nodedig.”
Dywedodd Cadeirydd y Llywodraethwyr Robert Evans: “Rydym wrth ein bodd bod yr arolygiad yn cydnabod gwaith caled, ymroddiad ac ymrwymiad staff, disgyblion a chymuned ehangach yr ysgol. Mae'r adroddiad yn adlewyrchu'r amgylchedd croesawgar, gofalgar a chynhwysol y mae Ysgol Gymraeg Bro Morgannwg yn ymdrechu i'w greu bob dydd, lle mae pob dysgwr yn cael ei annog i gyflawni ei lawn botensial.
“Rydym yn arbennig o falch bod Estyn wedi cydnabod cryfder ein darpariaeth Gymraeg a'r ystod eang o gyfleoedd sydd ar gael i'n disgyblion.”
Dywedodd y Cynghorydd Rhiannon Birch, Aelod Cabinet dros Addysg, y Celfyddydau a'r Iaith Gymraeg: “Mae hwn yn adroddiad arolygu cadarnhaol iawn sy'n adlewyrchu ymroddiad arweinyddiaeth, staff, llywodraethwyr a disgyblion yr ysgol. Mae Estyn wedi cydnabod ethos cynhwysol yr ysgol, y profiadau dysgu o ansawdd uchel y mae'n eu darparu a'i hymrwymiad i ddatblygu sgiliau Cymraeg disgyblion. Llongyfarchiadau i bawb ar y cyflawniad hwn ac edrychwn ymlaen at barhau i gefnogi'r ysgol wrth iddynt adeiladu ar y cryfderau niferus hyn.”