Ffyniant twristiaeth y Fro yn cynhyrchu £381.9 miliwn ar gyfer economi leol
Ymwelodd mwy na chwe miliwn o bobl â Bro Morgannwg yn 2025, gan gynhyrchu tua £381.88 miliwn ar gyfer yr economi leol a chefnogi bron i 3,000 o swyddi.
Mae ffigurau newydd gan Gyngor Bro Morgannwg yn dangos bod yr economi ymwelwyr yn tyfu, gyda chyfanswm effaith economaidd twristiaeth yn codi 5.2 y cant dros y flwyddyn flaenorol.
Cynyddodd nifer yr ymwelwyr 2.9 y cant hefyd, gan gyrraedd 6.07 miliwn yn ystod 2025.
Croesawodd y Fro tua 640,000 o ymwelwyr dros nos, cynnydd o 8.6 y cant, tra bod 3.74 miliwn o ymwelwyr dydd yn teithio i'r ardal - i fyny 1.9 y cant.
Amcangyfrifir bod twristiaeth bellach yn cefnogi 2,918 o swyddi cyfwerth ag amser llawn ar draws y Fro, cynnydd o ddau y cant.
Mae'r canfyddiadau hefyd yn tanlinellu cryfder atyniadau naturiol y Fro, gydag ymwelwyr yn nodi'r arfordir a'r amgylchedd naturiol fel asedau mwyaf yr ardal.
Dywedodd y Cynghorydd Bronwen Brooks, Aelod Cabinet dros Leoedd Cynaliadwy: “Mae mwy na chwe miliwn o ymweliadau mewn un flwyddyn yn garreg filltir sylweddol, ac mae'n arbennig o galonogol gweld twf mor gryf mewn ymwelwyr dros nos. Mae'n dangos nad cyrchfan ar gyfer ymweliad cyflym yn unig yw'r Fro; mae cannoedd o filoedd o ymwelwyr yn dewis aros, cymryd eu hamser a phrofi gwirioneddol gyfoeth yr hyn sydd gennym i'w gynnig.
“Mae'n amlwg bod ein harfordir, cefn gwlad a'n hamgylchedd naturiol yn rhan enfawr o'n hapêl, ac rydym am i ymwelwyr deimlo croeso, i greu atgofion parhaol ac i adael gydag ymdeimlad gwirioneddol o'r hyn sy'n gwneud ein rhan o Gymru mor unigryw. Wrth i ni edrych i'r dyfodol, ein huchelgais yw adeiladu ar y llwyddiant hwn mewn ffordd sy'n dathlu ac yn diogelu'r pethau sy'n gwneud y Fro yn arbennig, gan sicrhau ei fod yn parhau i fod yn lle gwych i ymweld, gweithio a byw am genedlaethau i ddod.”
Er bod y ffigurau'n dangos twf parhaus, mae'r ymchwil hefyd yn tynnu sylw at gyfleoedd i gryfhau economi'r ymwelwyr ymhellach.
Mae'r Fro yn parhau i fod yn gyrchfan taith dydd ac egwyl byr yn bennaf - gyda chyfran uchel o ymwelwyr yn dod o fewn Cymru - yn tynnu sylw at y potensial i ddenu mwy o arosiadau rhyngwladol ac aml-nos yn y dyfodol.