Cymorth Cyngor Bro Morgannwg yn Rhoi Bywyd Newydd i Adeiladau'r Bont-faen
Mae cymorth gan Gyngor Bro Morgannwg yn helpu i roi bywyd newydd i adeilad nodedig y Bont-faen.
Mae hen adeilad banc Barclays yn cael ei drawsnewid i ofod cydweithio newydd, llety i westeion a bar sudd a smwddi.
Drwy ei Gynllun Benthyciadau Canol Tref a'i Grantiau Gwella Masnachol, mae'r Cyngor wedi helpu i ddatgloi dyfodol newydd i'r adeilad, gan ariannu gwelliannau a fydd yn caniatáu i'r adeilad fynd i bennod newydd ar y stryd fawr.
Mae'r prosiect yn cael ei arwain gan y busneswraig leol Lyndsey Jenkins, sylfaenydd yr asiantaeth gyfathrebu creadigol jamjar a fydd hefyd yn adleoli i'r adeilad ar ôl ei gwblhau.
Mae'r buddsoddiad yn rhan o waith ehangach y Cyngor i gefnogi adfywio canol trefi ledled y Fro a dod ag eiddo masnachol gwag yn ôl i ddefnydd cynhyrchiol.
Dywedodd y Cynghorydd Bronwen Brooks, Aelod Cabinet dros Leoedd Cynaliadwy: “Mae'n wych gweld yr adeilad nodedig hwn yn cael ei ddwyn yn ôl i ddefnydd a rhoi pwrpas newydd yng nghanol y Bont-faen.
“Mae prosiectau fel hyn yn dangos beth y gellir ei gyflawni pan fydd busnesau lleol yn cael y gefnogaeth i fuddsoddi yng nghanol ein trefi. Mae dod ag eiddo gwag yn ôl i ddefnydd nid yn unig yn helpu i gryfhau ein strydoedd mawr, ond hefyd yn creu cyfleoedd newydd i fusnesau, preswylwyr ac ymwelwyr.
“Rydym yn falch o fod wedi cefnogi'r prosiect hwn drwy ein cynlluniau grant a benthyciadau, ac edrychwn ymlaen at weld yr Hen Fanc yn agor ei ddrysau.”
Dywedodd Lyndsey Jenkins, sylfaenydd Yr Hen Fanc a rheolwr gyfarwyddwr jamjar: “Ar ôl rhedeg busnes yn y Bont-faen ers mwy na 14 mlynedd, rwy'n hynod angerddol am y dref a'i Stryd Fawr, felly mae'n gyffrous bod yn rhoi bywyd newydd i adeilad mor amlwg.
“Ein gweledigaeth ar gyfer Yr Hen Fanc yw creu lle sy'n dod â phobl i ganol y Bont-faen — boed hynny i weithio, cwrdd, aros neu dreulio amser yma yn syml. Rydym am greu man gwaith hyblyg ar gyfer y nifer cynyddol o bobl sy'n gweithio o bell neu'n rhedeg eu busnesau eu hunain, tra bydd y llety gwestai a'r bar sudd yn dod â chymysgedd hollol wahanol o bobl i mewn i'r adeilad.
“Mae ymgymryd â phrosiect o'r raddfa hon yn fuddsoddiad sylweddol ac mae'r gefnogaeth rydyn ni wedi'i dderbyn gan Gyngor Bro Morgannwg wedi bod yn amhrisiadwy wrth ein helpu i ddod â'n cynlluniau yn fyw. Rydym yn edrych ymlaen at agor y drysau yn ddiweddarach eleni a gweld Yr Hen Fanc yn dod yn rhan o bennod nesaf Stryd Fawr y Bont-faen.”
Mae'r Cynllun Benthyciadau Trawsnewid Trefi: Canol Trefi wedi'i gynllunio i gefnogi adfywio canol trefi ledled Bro Morgannwg, gan helpu busnesau a pherchnogion eiddo i ddod â safleoedd masnachol gwag yn ôl i ddefnydd a buddsoddi yn eu strydoedd mawr.
Am ragor o wybodaeth am y cynlluniau a'r grantiau sydd ar gael - gan gynnwys manylion ynghylch cymhwysedd a sut i wneud cais, cliciwch yma.
I unrhyw un sydd â diddordeb mewn dod yn aelod o ofod cydweithio Yr Hen Fanc i ymweld â theoldbankcowbridge.co.uk am ragor o wybodaeth, a chofrestru eu diddordeb cyn ei agor yn ddiweddarach eleni.