Adeiladwr yn cael ei erlyn gan Gyngor Bro Morgannwg 

Plediodd Philip Royle yn euog yn Llys Ynadon Caerdydd ar ôl i dystiolaeth ei gysylltu ef â gwastraff a adawyd yn Wrinstone Lane yng Ngwenfô’r llynedd.

Cynhaliodd swyddogion y Cyngor ymchwiliad cymhleth dros gyfnod o 12 mis ac olrhain y gwastraff i dri eiddo yn ardal Caerdydd lle'r oedd Royle wedi gwneud gwaith. 

Pan holwyd Royle am y tro cyntaf, honnodd Royle, a oedd yn gweithredu fel Cardiff Builders Ltd ac sydd wedi'i leoli yn y ddinas, ei fod wedi trosglwyddo'r gwastraff i drydydd parti, ond ni chanfu swyddogion y Cyngor unrhyw dystiolaeth o hyn. 

Gorchmynnodd y Llys i Royle dalu dirwy o £492, costau o £860 a gordal dioddefwr o £49.

Mae Cyngor Bro Morgannwg yn ymchwilio i adroddiadau o dipio anghyfreithlon ac mae ganddo nifer o fesurau i ddod â throseddwyr o flaen eu gwell. Rhoddir hysbysiadau cosb benodedig o £100 i £400 yn rheolaidd am y drosedd hon yn ogystal â taflu sbwriel, baw cŵn a rheoli gwastraff, gyda chamau llys yn dilyn ar gyfer y rhai sy'n methu â thalu.

Daw'r achos llys hwn yn dilyn erlyniad llwyddiannus ym mis Chwefror am ddyn gafodd orchymyn i dalu £913 am dipio anghyfreithlon yn Lecwydd. 

Dywedodd y Cynghorydd Mark Wilson, Aelod Cabinet Cyngor Bro Morgannwg dros Wasanaethau Cymdogaeth ac Adeiladu:

 

"Nid oes gan y Cyngor unrhyw oddefgarwch tuag at dipio anghyfreithlon ac mae ein Swyddogion Gorfodi Amgylcheddol yn gwneud gwaith gwych o batrolio mannau problemus lle mae'n hysbys bod y drosedd hon yn digwydd.

"Rwy'n gobeithio y bydd y dyfarniad hwn yn anfon neges at y rhai sy'n ystyried tipio anghyfreithlon.  Mae Cyngor Bro Morgannwg yn cymryd y drosedd hon o ddifrif a bydd yn erlyn unrhyw un y canfyddir ei fod wedi'i gyflawni hyd eithaf y gyfraith.  

"Rwyf hefyd yn ddiolchgar bod y Llys wedi cydnabod difrifoldeb y drosedd hon yn y gosb a roddwyd.  Mae'n bwysig i bob deiliad tŷ gofio bod ganddynt ddyletswydd gyfreithiol i sicrhau bod masnachwyr wedi'u trwyddedu i gymryd eu gwastraff. 

"Rwy'n ddiolchgar iawn am gydweithrediad y deiliaid tai hynny y canfuwyd eu gwastraff yn anghyfreithlon ac a gynorthwyodd ein swyddogion yn yr ymchwiliad." 

 

Mae canlyniadau cael eich dal yn tipio’n anghyfreithlon yn amrywio o gael Hysbysiad Cosb Benodedig, i ddirwyon o hyd at £50,000 neu hyd yn oed garchar.

Gellir adrodd am achosion o dipio anghyfreithlon ar wefan y Cyngor lle gellir dod o hyd i wybodaeth ar sut i gael gwared ar wastraff yn gyfrifol hefyd.