Datganiad y Cyngor ar y defnydd o'r Holiday Inn Express
Mae'r Holiday Inn Express yn y Rhws wedi'i ddewis gan y Weinyddiaeth Amddiffyn i'w ddefnyddio fel llety dros dro ar gyfer Personau Hawl o Afghanistan ar sail tymor byr.
Mae hwn yn gynllun Llywodraeth y Deyrnas Unedig (DU), dan arweiniad y Weinyddiaeth Amddiffyn, felly y Weinyddiaeth Amddiffyn yw'r sefydliad mwyaf priodol i roi manylion am y trefniant.
Fodd bynnag, gan fod dyfalu a chamwybodaeth wedi bod am y prosiect ar y cyfryngau cymdeithasol ac o fewn y gymuned leol, mae'r Cyngor yn teimlo ei bod yn bwysig bod trigolion yn cael y ffeithiau.
Fel Personau Hawl, mae gan y grŵp hwn yr hawl i fyw yn y DU yn dilyn eu hymdrechion i gefnogi'r fyddin Brydeinig yn Afghanistan.
Nid mewnfudwyr anghyfreithlon, ceiswyr lloches na ffoaduriaid yw'r aelwydydd hyn. Mae Llywodraeth y DU wedi rhoi caniatâd amhenodol i aros yn y wlad hon, sydd bellach yn cael ei hystyried fel eu cartref.
Bydd y cyntaf o ddau grwp, y disgwylir cyn bo hir, yn cynnwys 19 o deuluoedd â phlant, tri phâr a pherson sengl.
Mae'r trefniant dros dro hwn, sy'n para hyd at naw mis, ar waith tra byddant yn cael eu helpu i ddod o hyd i lety mwy parhaol ledled y DU.
Dywedodd y Cynghorydd Lis Burnett, Arweinydd Cyngor Bro Morgannwg: “Mae'r lleoliad hwn wedi'i ddewis gan y Weinyddiaeth Amddiffyn fel rhan o gynllyn i helpu grŵp penodol o bobl sydd wedi ffoi o Afghanistan ar ôl gweithio mewn partneriaeth â Lluoedd y DU yn y wlad honno.
“Mae ganddyn nhw bob hawl i fyw yn y wlad hon yn dilyn yr ymrwymiad a'r teyrngarwch maen nhw wedi'u dangos ac, mewn nifer fawr o achosion, yr aberthau maen nhw wedi'u gwneud.
“Nid menter gan y Cyngor yw hon, ond un sydd wedi'i threfnu a'i gweithredu gan y Weinyddiaeth Amddiffyn, yr ydym yn ei gefnogi. Yn yr un modd â chynlluniau blaenorol, mae Llywodraeth y DU wedi darparu cyllid.
“Mae gan gymunedau y Fro hanes hir o helpu'r rhai mewn angen ac mae gwerthoedd sy'n ymwneud â goddefgarwch, derbyn, dealltwriaeth a chynhwysoldeb yn nodwedd ganolog o ethos a dull gweithredu parhaus y Cyngor hwn.
“Yn naturiol, rydym hefyd yn gofalu am ein preswylwyr presennol ac yn teimlo y dylech gael gwybod am yr hyn sy'n digwydd yn eich ardal chi.
“Dros yr wythnosau diwethaf, mae timau Cyngor wedi bod yn gweithio gyda chydweithwyr o'r Weinyddiaeth Amddiffyn, Llywodraeth Cymru ac asiantaethau eraill i baratoi ar gyfer cyrraedd.
“Mae sgyrsiau cychwynnol wedi digwydd gydag ysgolion lleol i asesu'r capasiti presennol a'r posibilrwydd o osod plant, ond ni ellir gwneud penderfyniadau terfynol nes bod yr Personau Hawl yn cyrraedd a bod oedran y plant yn hysbys. Fel sy'n gyffredin wrth ddelio â materion sensitif fel hyn, mae angen cadw'r trafodaethau hyn yn gyfrinachol.
“Bydd Llywodraeth y DU yn darparu cyllid i gefnogi addysg a chynyddu capasiti gwasanaethau iechyd fel meddygfeydd meddygon.
“Mae gennym enghraifft ddisglair o ba mor llwyddiannus y gall lleoliad Personau Hawl dros dro fod yn Sain Tathan gerllaw, lle roedd y gymuned leol yn cofleidio cyrraedd o Afghanistan yn aros ar ganolfan y fyddin yno.
“Gwahoddwyd yr unigolion hynny i ymuno â chlybiau chwaraeon lleol, tra bod trigolion yn gweithio gyda'i gilydd i gasglu eitemau y gallai fod eu hangen arnynt i fod yn fwy cyfforddus. Rwy'n hyderus y bydd pobl y Rhws, y Barri ac ardal ehangach Bro Morgannwg yr un mor groesawgar.
“Bydd llawer o'r bobl hyn wedi dioddef trawma mawr, wedi rhoi'r gorau i bopeth a gadael eu cartrefi i symud i wlad newydd. Mae'n debygol iawn y byddant yn teimlo'n agored i niwed ac yn ofnus wrth iddynt ddechrau bywyd hollol newydd.
“Y Fro fydd cartref cyntaf y teuluoedd hyn yn y DU — ni yw ein helpu i gyd-fynd ac addasu i fywyd yma. Fel cymuned, rwy'n siŵr y byddwn yn cynnig yr empathi a'r urddas y maent yn ei haeddu iddyn nhw.
“Rwy'n falch o'n llwyddiannau blaenorol. Mae gan bobl yn y Fro hanes cyson o gyfarch pobl newydd â chynhesrwydd, lletygarwch a thosturi. Dyna rydyn ni'n ei wneud oherwydd dyna'r math o le rydyn ni i gyd eisiau byw ynddo.”
Mae'r Cyngor mewn cysylltiad rheolaidd â'r Weinyddiaeth Amddiffyn a phartneriaid eraill a bydd yn rhoi diweddariadau pellach ar y mater hwn wrth i'r sefyllfa ddatblygu.
Mae rhagor o wybodaeth am gynllun ailsefydlu Afghanistan ar wefan Llywodraeth y DU.