GlastonBarry i rocio Parc Romilly tan 2029 gyda chytundeb trwydded newydd
Mae Cyngor Bro Morgannwg yn falch iawn o gymeradwyo cytundeb trwydded pum mlynedd newydd gyda Mack Events - trefnwyr gŵyl hynod boblogaidd GlastonBarry - gan sicrhau'r digwyddiad ym Mharc Romilly tan 2029.
Nawr yn dechrau ei 12fed flwyddyn, mae GlastonBarry wedi dod yn ddigwyddiad eiconig yn y dref, gan ddenu miloedd o bobl o bob rhan o Dde Cymru a thu hwnt.
Gyda hyd at 6,000 o bobl bob dydd, mae GlastonBarry yn parhau i dyfu mewn poblogrwydd, gan ddod â buddion economaidd a chymunedol sylweddol gydag ef.
Amcangyfrifir bod 50% o fynychwyr yn teithio o'r tu allan i ardal y Barri, a chredir bod yr ŵyl yn cynhyrchu dros £2.19 miliwn i'r economi leol - gan gynnig hwb mawr i'r sectorau lletygarwch a gwasanaeth ym Mro Morgannwg.
Mae'r cytundeb yn dilyn cais gan Mack Events i gael mwy o sicrwydd ar gyfer cynllunio'r ŵyl yn y tymor hir ac yn caniatáu i'r trefnwyr barhau i wella'r profiad i fynychwyr yr ŵyl a'r gymuned leol fel ei gilydd.
Dywedodd y Cynghorydd Bronwen Brooks, Dirprwy Arweinydd ac Aelod Cabinet dros Leoedd Cynaliadwy: “Rydym yn falch o gefnogi GlastonBarry ac yn cydnabod y gwerth enfawr y mae'n ei ddwyn i'r Barri a'r Fro ehangach.
“Mae Mack Events wedi bod yn bartneriaid rhagorol ac wedi gweithio'n agos gyda ni i sicrhau bod yr ŵyl yn ddiogel, yn cael ei rheoli'n dda ac yn cael ei mwynhau gan bawb.
“Mae'r cytundeb trwydded newydd hwn yn rhoi'r hyder iddynt barhau i adeiladu ar eu llwyddiannau, ac edrychwn ymlaen at weld GlastonBarry yn ffynnu a thyfu am flynyddoedd i ddod.”
Dywedodd Matt Blumberg, Cyfarwyddwr Mack Events: “Rydym yn falch iawn o fod yn gweithio gyda Chyngor Bro Morgannwg eto ar GlastonBarry. Rydym yn cydnabod pa mor bwysig yw'r digwyddiad hwn i bobl y Barri a thu hwnt, ac fel preswylydd yn y Barri, rwyf mor falch o allu gwarantu yr ŵyl gerddoriaeth nodedig hon ym Mharc Romilly am y pum mlynedd nesaf.
“Rwy'n edrych ymlaen at y digwyddiad eleni a'r llawer mwy i ddod ac yn diolch i'r Cyngor am eu cefnogaeth barhaus ac i bawb sy'n mynychu ein digwyddiadau o flwyddyn i flwyddyn.”
O dan delerau'r drwydded newydd, bydd GlastonBarry yn parhau i gael ei gynnal ym Mharc Romilly, gyda'r cae canolog wedi'i amgáu am hyd at saith diwrnod er mwyn caniatáu ar gyfer trefnu’r digwyddiad a thynnu’r llwyfannau i lawr ar y diwedd. Bydd gweddill y parc yn parhau i fod ar agor i'w ddefnyddio gan y cyhoedd drwy gydol y cyfan.
Mae'r holl berfformiadau bob dydd yn dechrau o 12y.p a byddant yn dod i ben erbyn 9y.p gyda'r nos, gyda sioe ddydd Gwener wedi'i anelu at gynulleidfaoedd iau a'r digwyddiadau Sadwrn a dydd Sul yn gyfyngedig i bobl dros 18 oed.