Cyngor Bro Morgannwg yn Lansio Gwasanaeth Ailgylchu Tecstilau Newydd
Mae Cyngor Bro Morgannwg yn cyflwyno gwasanaeth ailgylchu tecstilau newydd i helpu trigolion i roi ail fywyd i ddillad diangen a ffabrigau cartref.
O ddydd Llun 17 Tachwedd 2025 ymlaen, bydd tecstilau y gellir eu hailddefnyddio fel dillad, esgidiau, bagiau llaw, tyweli, dillad gwely, a llenni yn cael eu casglu o aelwydydd a'u hanfon at gwmni arbenigol sy'n ailddosbarthu eitemau o safon yn y DU a thramor.
Mae hyn yn sicrhau bod modd ailddefnyddio'r eitemau gan bobl sydd eu hangen, gan helpu hefyd i leihau allyriadau gwastraff a charbon.
Mae lansio'r gwasanaeth newydd hefyd yn cyd-fynd ag Wythnos Hinsawdd Cymru 2025.
Trigolion y Barri fydd y cyntaf i elwa o'r gwasanaeth newydd, ac yna bydd y cynllun yn cael ei gyflwyno'n raddol i bob cartref ledled y sir.
Gofynnir i breswylwyr sicrhau bod yr holl eitemau a gyflwynir i'w casglu yn lân, yn sych, ac mewn cyflwr gwisgadwy, a bod esgidiau yn cael eu paru gyda'i gilydd.
Mae'r eitemau a dderbynnir yn cynnwys:
- Dillad bob dydd
- Parau o esgidiau
- Bagiau llaw
- Tyweli
- Cynfasau gwely
- Lliain bwrdd, rhedwyr a napcynau
- Llenni ac eitemau ffabrig tebyg
Mae'r eitemau na dderbynnir yn cynnwys:
- Gwisgoedd wedi'u brandio neu gorfforaethol
- Dillad gwaith gwelededd uchel neu ddiogelwch
- Dwfes, cwiltiau, ney clustogau
- Unrhyw eitemau sydd wedi'u difrodi, wedi'u rhwygo, wedi'u baeddu'n drwm, neu'n wlyb
Anogir trigolion sy'n byw y tu allan i'r Barri i barhau i fynd â thecstilau y gellir eu hailddefnyddio i'w Canolfan Ailgylchu leol neu ystyried rhoi neu werthu eitemau ar-lein neu mewn siopau elusennau lleol nes bod y gwasanaeth yn cael ei gyflwyno ledled y sir.
Dywedodd y Cynghorydd Mark Wilson, Aelod Cabinet dros Wasanaethau Cymdogaeth ac Adeiladu: “Rydym yn falch iawn o gyflwyno'r cynllun newydd gwych hwn, a fydd yn ei gwneud hi'n haws i drigolion ailgylchu tecstilau o gartref.
“Mae'r gwasanaeth ailgylchu tecstilau yn cyd-fynd yn agos ag uchelgeisiau Prosiect Sero y Cyngor i leihau ein hallyriadau carbon i sero net erbyn 2030 ac mae hefyd yn cefnogi dull cenedlaethol Llywodraeth Cymru o ailgylchu a rheoli gwastraff drwy sicrhau ein bod yn ailgylchu o leiaf 70% o'n gwastraff.
“Drwy roi ail fywyd i ddillad a ffabrigau diangen, rydym yn creu dyfodol mwy cynaliadwy i bawb, a byddwn yn ychwanegu at y dewis o ble mae pobl yn rhoi eu dillad a thecstilau eraill”
Gan fod hwn yn wasanaeth newydd sbon, mae'r Cyngor yn gofyn i drigolion gyfyngu eu tecstilau i un bag fesul casgliad yn ystod y misoedd cyntaf ar ôl y lansiad er mwyn helpu timau casglu i ddeall faint o ddeunydd y maent yn debygol o gael wrth gyflwyno’r gwasanaeth yn ehangach.
Am ragor o wybodaeth am y Gwasanaeth Ailgylchu Tecstilau, cliciwch yma.