Prosiect Adfywio Glannau y Barri yn Symud Gam yn Nes
Mae cynllun adfywio mawr wedi symud gam yn nes ar ôl i elfennau o Brosiect Creu Tonnau'r Barri gael caniatâd cynllunio.
Cymeradwyodd Pwyllgor Cynllunio'r Cyngor gynigion ar gyfer canolfan chwaraeon dŵr, cyfleuster addysg a chaffi ar ardal a elwir yn y ‘Mole’.
Rhoddwyd y golau gwyrdd i gynlluniau ar gyfer 100 uned o dai a pharc hefyd mewn cyfarfod wythnos diwethaf.
Bydd elfen arall o'r prosiect, nad oedd yn rhan o'r cais cynllunio, yn gweld adeilad Swyddfa Doc y Cyngor yn cael ei ailddatblygu i fod yn ofod datblygu busnes.
Dywedodd y Cynghorydd Lis Burnett, Arweinydd Cyngor Bro Morgannwg: “Bydd y prosiect cyffrous hwn yn trawsnewid rhan o Glannau y Barri, gan roi hwb i'w apêl yn sylweddol a helpu i gefnogi busnesau lleol.
“Bydd y ganolfan chwaraeon dŵr yn cynnig gweithgareddau hamdden o'r radd flaenaf i ddod ag ymwelwyr i'r Barri, tra rydym hefyd yn adeiladu tai, a bydd llawer ohonynt yn fforddiadwy, yn gwneud gwaith tirlunio a chreu parc.
“Mae adeilad hanesyddol Swyddfa'r Dociau yn cael bywyd newydd fel gofod modern, cyffrous a fydd yn cefnogi busnesau, yn denu buddsoddiad a hefyd yn dod â mwy o bobl i'r ardal.
“Mae hyn i gyd yn ymwneud ag adeiladu dyfodol disglair i'r Barri, creu swyddi, cryfhau'r economi leol a gwneud y gorau o'n glannau anhygoel.”
Mae'r gwaith hwn yn cael ei ariannu gyda chymorth ychydig o dan £20 miliwn gan Raglen Ffyniant Bro Llywodraeth y DU.