Arddangosfa Beryl Rhys Wilhelm yn Agor yn Llyfrgell y Barri

Mae Oriel Gelf Ganolog yn Llyfrgell y Barri yn falch o gyflwyno ei harddangosfa ddiweddaraf, sy'n arddangos gwaith cyfareddol yr artist lleol Beryl Rhys Wilhelm.

• Dydd Iau, 09 Mis Hydref 2025

  Bro Morgannwg

Yn breswylydd hir-oes yn y Barri, mae Beryl wedi byw yn y dref ers bron i 40 mlynedd. Wrth siarad am yr arddangosfa, dywedodd ei bod wrth ei bodd o gael y cyfle i gyflwyno ei sioe unigol gyntaf.

Agorodd yr arddangosfa yn swyddogol ddydd Sadwrn, 27 Medi 2025, ac mae'n cynnwys detholiad o ddarnau nodedig Beryl, pob un wedi'i drwytho ag ansawdd swreal neu hudol a dynnir o'r cof a'r dychymyg.

Fe'i ganed yn Llanelli ac astudiodd Beryl yng Ngholeg Celf Llanelli ar ôl gorffen yr ysgol. Dechreuodd ei thaith artistig o ddifrif ar ddechrau'r 1970au ac ers hynny, mae hi wedi paentio bron bob dydd, gan ddatblygu arddull unigryw sy'n defnyddio dim ond tri lliw cynradd a gwyn.

Dros y blynyddoedd, mae Beryl wedi gwerthu mwy na 200 o baentiadau, gan gynnwys nifer o weithiau a gomisiynwyd.

Mae ei chelf wedi'i hysbrydoli'n ddwfn gan dirweddau Cernyw a Bafaria - man geni ei gŵr - yn ogystal â golygfeydd mynydd dramatig ei Chymru enedigol.

Dywedodd y Cynghorydd Rhiannon Birch, Aelod Cabinet dros Addysg, y Celfyddydau a'r Iaith Gymraeg: “Rydym yn falch iawn o fod yn cynnal gwaith celf Beryl yn yr oriel, mae'n drawiadol o ran lliw a strwythur. Mae pob darn yn cynnig cipolwg unigryw i fydoedd sy'n bodoli ac sy'n cael eu dychmygu, ac mae hi'n trwytho ei gwaith gydag awyr swrrealistig neu hudol, wedi'i hysbrydoli gan atgofion a dychymyg.”

Mae'r arddangosfa yn rhedeg tan ddydd Sadwrn, 8 Tachwedd 2025. Am ragor o wybodaeth, cliciwch yma.