Oriel Celf Ganolog

Neuadd y Dref, Sgwâr y Brenin, Y Barri CF63 4RW (Mynediad drwy lyfrgell y sir)

Lleolir oriel Celf Ganolog, gofod arddangos clodfawr y Fro, yng nghanol y sir. Mae’n lle godidog i arddangos ynddo, i ymweld ag e ac i werthfawrogi celf ynddo.

Mae oriel Celf Ganolog yn ofod golau, hyblyg a chroesawgar Mae rhaglen Celf Ganolog yn cynnwys arddangosfeydd amrywiol gan artistiaid, grwpiau cymunedol, ac arddangosfeydd amlwg a theithiol. Mynediad AM DDIM.

@ValeArts

Oriel Celf Ganolog

Universal Energy in Art

Beryl Rhys Wilhelm

O ddydd Sadwrn 20 Medi i ddydd Sadwrn 01 Tachwedd 2025

Digwyddiad Agoriadol Dydd Sadwrn 27 Medi 2025, 1pm i 3pm

Artist o’r Fro yw Beryl Rhys Wilhelm, sydd wedi bod yn creu ei phaentiadau unigryw ers blynyddoedd lawer. Dechreuodd ei diddordeb mewn celf pan oedd yn blentyn, a hithau’n byw yn Llanelli, yn treulio amser yn darlunio pobl, golygfeydd theatrig a thestunau eraill a ddylanwadodd ar ei bywyd ar y pryd. Mae enghreifftiau cynnar o'i gwaith o’i llyfr braslunio i'w gweld fel rhan o'r arddangosfa.

Mynychodd Beryl yr hyn a oedd yn Goleg Celf Llanelli ar y pryd (Coleg Sir Gâr heddiw), lle bu’n astudio am Ddiploma mewn Celf. Ar ôl priodi, parhaodd i baentio yn ei hamser hamdden, wrth iddi ofalu am ei theulu. Mae mynyddoedd a thirweddau Awstria, lle byddai Beryl a'i theulu’n aml yn mynd ar wyliau, wedi cael dylanwad mawr ar rai o'i gweithiau celf.

Ar ôl byw yng Nghaerdydd, symudodd y teulu i Gernyw lle, unwaith eto, ysbrydolodd y golygfeydd lleol ei hymarfer creadigol. Yn y pen draw, hiraeth i ddychwelyd i'w gwlad enedigol a ysgogodd yr artist i ddod yn ôl i Gymru, ac ymgartrefodd yn y Barri.

Mae Beryl yn paentio bob dydd, a phrin yn gallu rhoi ei brwsys i lawr. Y canlyniad yw casgliad o atgofion, breuddwydion, gweledigaethau, a phrofiadau bywyd, sydd wedi amlygu eu hunain trwy liwiau cynnil a dramatig, delweddaeth, a rhywbeth y mae'n hi’n ei ddisgrifio fel “dychymyg pur”. Gan ddefnyddio dim ond tri lliw sylfaenol a gwyn, mae ei dull o dros-haenu a chymysgu paent yn ofalus yn cynhyrchu darnau lliwgar, trawiadol ac annaearol. Mae'r tirweddau – gyda ffigurau cudd, bywyd gwyllt, ac wybrennau dramatig – yn denu’r syllwr i mewn i'r gwaith, i chwilio am fanylion a negeseuon cudd.

Mae'r artist wedi gwerthu dros 200 o baentiadau ac wedi ymgymryd â sawl comisiwn.

Dywedodd Beryl: “Rwy'n ceisio llenwi fy mhaentiadau gyda naws swrealaidd neu hudolus, sy’n aml wedi’i ysbrydoli gan atgofion a dychymyg; rhywbeth rwy'n teimlo sydd y tu hwnt i’r byd hwn.”

Dywedodd y Cynghorydd Rhiannon Birch, Aelod Cabinet dros Addysg, y Celfyddydau a'r Gymraeg: “Rydym wrth ein bodd yn arddangos gwaith celf Beryl yn yr oriel. Bydd ei harddull unigryw a'i gwaith lliwgar yn apelio at gynulleidfa eang.”

Bydd y digwyddiad agoriadol ar gyfer Universal Energy in Art gan Beryl Rhys Wilhelm yn cael ei gynnal yn yr Oriel Gelf Ganolog, y Barri, ddydd Sadwrn 27 Medi, o 1-3pm. Mae croeso i bawb fynychu, ac edrychwn ymlaen at eich gweld chi yn yr oriel.

Gwelwch dudalen yr Oriel Gelf Ganolog ar Facebook.

Ar y gweill! yn yr Oriel Gelf Ganolog

Arddangosfeydd Blaenorol

SuBCuLtUre

Redvers John

02.08.2025 – 13.09.2025

Digwyddiad Agored 02.08. 2025

Redvers John – Artist Celf Gain. Graddiodd gyda gradd o Goleg Sir Gâr ar ôl astudio Paentio, Tynnu Lluniau a Gwneud Printiau. Mae ffocws a diddordeb John ar gyfer ei waith yn ymwneud â chasgliad a chof lle mae collage, papur wedi'i rwygo a theipograffeg yn ymddangos yn sylweddol yn ei waith. Fel artist Cymreig balch, mae John hefyd wedi cael ei ddylanwadu gan dirweddau Cymru sy'n helpu i ysbrydoli ei baentiadau.

Mae gwaith John yn adlewyrchu ei atgofion, sy'n gysylltiedig yn gynhenid â chasgliad yr artist o recordiau finyl, pethau cofiadwy cerddorol, tirluniau, ac atgofion personol. Mae arferion celf diweddar John wedi'u hysbrydoli gan y modernydd Kurt Schwitters, casgliadau Merz a chollages y 1940au, a Jamie Reid, artist cain cyfoes eiconig a dylunydd cloriau recordiau, ar gyfer bandiau pync ar ddiwedd y 1970au.

Mae gweithiau diweddaraf John, sy'n cynnwys printiau, cyfryngau cymysg a phaentiadau, yn gyfuniad o ddelweddau personol, ffotograffiaeth, a phrint, wedi'u rhwygo i greu cyfansoddiadau collage. Yna mae'n trin y delweddau gan ddefnyddio ffotograffiaeth, cyn ailargraffu'r gwaith, gan ailadrodd yr un broses gan ddefnyddio'r cyfansoddiadau newydd gan rwygo, haenu ac ailadrodd trwy baentio. Mae'r cyfuniad o'r haenau hyn yn cael eu hasio gyda'i gilydd a'u rhewi mewn amser go iawn a ffuglennol. Mae ei broses greadigol yn canolbwyntio ar amser, gan gymryd oriau lawer i fyfyrio ar y gwahanol haenau o ail-gyfluniad cyn i'r darn olaf ddod i'r amlwg.

Mae'r gweithiau celf yn cael eu dylanwadu gan y symudiad Pync Roc eiconig a oedd yn herio arferion ac yn hyrwyddo unigoliaeth a chynhwysiant trwy gelf. Mae'r gweithiau'n archwilio cerddoriaeth ffasiwn ac actifiaeth wleidyddol a diwylliannau materol a materion cyfoes. Mae’r elfennau gwleidyddol-gymdeithasol yn y gwaith yn cael eu dwyn i'r amlwg, trwy ddefnyddio eiconau ar hap ond yn eitemau a deunyddiau sydd wedi'u dewis yn ofalus o'r gorffennol a'r presennol. Mae'r gwaith yn dangos ymdeimlad o hiraeth wrth ragweld byd ffyrnig ac ansicr globaleiddio heddiw.

Tir a MÔR I Land and Sea

KATE MONTEFIORE a ZINC

Tir a MÔR – Land and Sea, yn gymysgedd eclectig o brintiau a phaentiadau, yn ganmoliaethus a chyferbyniol.

Ydych chi erioed wedi oedi i ddod o hyd i bob cysgod o liw mewn awyr lwyd? Neu efallai sylwi ar y tonnau y mae glaswelltau hir yn eu gwneud yn y gwynt?

Mae'r artistiaid Kate Montefiore a Zinc yn cyflwyno gwaith sydd â chysylltiad dwfn â thir a morluniau, sy'n ein hamgylchynu yn Ne Cymru, gan rannu eu profiadau gydag arsylwi mor agos.

Mae'r artistiaid yn trin lliw, ystum a gwead fel cyfleoedd i ehangu ac ystyried yr amgylchedd gan ddefnyddio amrywiaeth o gyfrwng ac arddulliau artistiaid. Mae ansawdd y golau yn unigryw o dan awyr Cymru ac yn aml yn effeithio ar y newidiadau lliw ym myd natur. Gellir gweld y manylion hwn yng ngwaith Kate a Zinc, yn enwedig yn eu defnydd o gymysgu lliwiau.

KATE MONTEFIORE

Astudiodd Kate yn Ysgol Gelf St Martins, Llundain ac mae ganddi radd mewn Dylunio Theatr o Ysgol Gelf Birmingham. Mae hi wedi cael gyrfa amrywiol ym maes rheoli celfyddydau, gydag angerdd am gefnogi'r celfyddydau gan gyrraedd cynulleidfaoedd ehangach. Mae ei phrofiadau yn amrywiol, gan gyfnewid rhwng ysgrifennu a'r celfyddydau, gweinyddu cerddoriaeth a dawns, i ddychwelyd unwaith eto at ei chariad at gelf a gwneud printiau.

Mae gwaith Kate yn gymysgedd gwych o ysgythriad pwynt sych, chine-collé, collagraff ac argraffu monoteip. Gan ddefnyddio deunyddiau naturiol a darganfuwyd, mae Kate yn mwynhau arbrofi a datblygu ei phroses greadigol a chwarae gyda thechnegau argraffu gwahanol gyda chanlyniadau syndod ac unigryw. Mae hi'n cael ei denu yn arbennig at argraffu monoteip am ei ddigymellrwydd a'i gallu i ddal natur chwythog, byth- newidiol ein hamgylchoedd. Mae ei gwaith mwyaf diweddar yn ddarnau arbrofol sy'n haenu inciau, dŵr a deunyddiau naturiol, gan adlewyrchu llif organig a thrawsnewid tir a morluniau.

ZINC

Mae fy nhaith artistig yn archwiliad ysbrydol cynyddol o fy undod â natur. Yn llyfr braslunio bob amser yn fy mhoced, rwy'n treulio fy nyddiau yn gorchuddio tawelwch yn fy meddwl i mi eistedd ymysg yr hyn sy'n fy ysbrydoli a thynnu fy nghelf o'r profiadau hynny'n reddfol. Er y gall fy ngwaith ymddangos i fod o bynciau heblaw fy hun, mae pob darn yn bersonol iawn; natur ydyn ni ein hunain. Mae fy hunaniaeth i, fel bod o'r Ddaear hon wedi'i phlytio â'r goeden rwy'n eistedd dani, rydym gyda'n gilydd yn yr eiliadau hynny. Gweithiir arno liw a haenu gyda gofal dwys am fanylder a greddf yn fy ngweithiau mawr oil; a rhoddir yr un gofal, wedi ei sianelu mewn allfa arall, yn fy brasluniau pen biro ffyrnig cyflym a'm gwaith llinell hyderus, a wnaed en awyr plaen.

Puppets and Curious Narratives

Dyddiadau Arddangos: 19 Ebrill – 31 Mai 2025

Yn agor: Dydd Sadwrn 19 Ebrill 2025 1:30pm - 3:30pm

Mae'r arddangosfa unigryw hon, sef 'Puppets and Curious Narratives' i'w gweld yn yr Oriel Gelf Ganolog, Y Barri. Mae'n arddangosfa ddiddorol a lliwgar sy'n cyfuno gwaith tri artist o Gymru, un ohonynt yn byw ac yn gweithio ym Mro Morgannwg.

Mae’n bleser gan yr artistiaid, Peter Raymond, Barbara Leith, a Frankie Locke; gyflwyno'r corff unigryw hwn o waith, sydd wedi esblygu o'u cefndiroedd theatr a chelf olygfaol. Cyfarfu'r artistiaid yn wreiddiol yng ngweithdai golygfeydd, propiau ac adeiladu Cwmni Opera Cenedlaethol Cymru, Caerdydd.

Mae'r pypedau cain, wedi'u creu â llaw gan Raymond, yn gymeriadau hyfryd o chwedlau, chwedloniaeth, straeon hanesyddol, a naratif cyfoes. Maen nhw’n werth eu gweld, gan ddenu'r gwyliwr i mewn gyda'u dyluniadau unigryw, eu lliwiau, eu hynodrwydd, a’r straeon sydd ynghlwm â nhw. Mae gwisgoedd y pypedau, ar gyfer pob cymeriad unigol, wedi'u gwneud â llaw yn ofalus gan Leith a'u paentio â llaw gan eu gwneuthurwr Raymond.

Mae Leith, artist, yn arlunydd ac yn wneuthurwr. Ar gyfer yr arddangosfa mae Leith wedi creu portreadau hardd gan ddefnyddio cyfrwng cymysg i gyflwyno ffigurau swynol mewn cypyrddau arddangos. Mae'r ffigurau wedi'u haddurno â dillad wedi'u teilwra'n ofalus, sy'n dangos ei sgiliau cain a manwl mewn sawl cyfryngau creadigol.

Yn cael eu harddangos gyda nhw mae darluniau godidog gan yr artist a'r ceramegydd Frankie Locke. Mae'r delweddau, y lliw a'r naratif anarferol sy’n cael eu cyfleu gan Locke, yn cyd-fynd yn hyfryd â gwaith Leith a Raymond. Mae Locke yn animeiddio'r pypedau yn ei darluniau, gan ail-greu deialog weledol a golygfeydd amgen. Er gwaethaf y syniadau a'r arddulliau gwahanol, maen nhw’n creu cydamseredd rhwng pob darn, gan ganiatáu i'r gweithiau anadlu a siarad â'i gilydd.

Edrychwn ymlaen at eich croesawu i'r arddangosfa gyffrous ac anarferol hon.

Arddangosfa Agored Cymdeithas Celfyddydau Menywod Cymru

Dathlu Diwrnod Rhyngwladol y Menywod 2025 yn yr Oriel Gelf Ganolog

Dydd Sadwrn 8 Mawrth - Dydd Sadwrn 12 Ebrill 2025

Digwyddiad agoriadol: Dydd Sadwrn 8 Mawrth 2025 1pm - 3pm

Arddangosfa ar Agor: Dydd Llun – Dydd Sadwrn 9.30am – 4.30pm

Sgwrs Artist Dianne Setch: gyda Dianne Davies - Felicity Charlton ac Edith Downing: Dau Artist Cymraeg Cyferbyniol dydd Sadwrn 29 Mawrth am 2pm

Mae Cymdeithas Celfyddydau Menywod Cymru (WAAW) yn dathlu Diwrnod Rhyngwladol y Menywod 2025 yn Oriel Gelf Ganolog, Y Barri ym Mro Morgannwg. Mae'r arddangosfa agored yn cynnwys gwaith gan artistiaid benywaidd o bob cwr o Gymru. Bydd Diwrnod Rhyngwladol y Menywod yn cael ei nodi gan ddigwyddiad ar y diwrnod, dydd Sadwrn 8 Mawrth 1:00pm - 3:00pm, mae croeso i bawb.

Mae Cymdeithas Celfyddydau Menywod Cymru yn falch iawn o gyhoeddi y byddant yn cynnal y digwyddiad blynyddol Sgwrs Artist Dianne Setch, ddydd Sadwrn 29 Mawrth 2025 am 2pm, Oriel Gelf Ganolog. Y siaradwr eleni yw Diane Davies yn sôn am 'Felicity Charlton ac Edith Downing: Dau Artist Cyferbyniol o Gymru. Archebwch le drwy Eventbrite.

Mae’r Sgwrs wedi ei neilltuo i’r aelod a sefydlodd y Gymdeithas am ei chyfraniadau fel artist ac aelod trefnu. Mae Setch yn parhau i fod mewn cysylltiad â'r sefydliad ac yn mynychu'r sgyrsiau blynyddol.

Mae'r sefydliad wedi bod yn cynnal digwyddiadau celfyddydau creadigol Diwrnod Rhyngwladol y Menywod ers dros ddeugain mlynedd. Mae'r arddangosfa'n gynhwysol ac yn galluogi pob menyw, gan gynnwys y gymuned LHDTCARh, i gymryd rhan yn y digwyddiad cyfunol hwn a bod yn rhan ohono. Nod yr arddangosfa yw cydnabod cyflawniadau, codi ymwybyddiaeth, gwelededd, y cymunedau benywaidd hyn, yn lleol, yn genedlaethol ac yn rhyngwladol, a hyrwyddo cydraddoldeb, i ddathlu'r digwyddiad byd-eang hwn.

Mae'r arddangosfa'n cynnwys amrywiaeth o waith, yn amrywio o decstilau, cerfluniau, paentiadau, gweithiau ffotograffig, collage a llawer mwy. Mae'r cyfle gwych hwn yn hyrwyddo cysylltiadau cydweithredol creadigol, rhwydweithio a chyfathrebu. Mae hi bob amser yn sioe boblogaidd i'r artistiaid a'r ymwelwyr fel ei gilydd.

Mae croeso i bawb ar 8 Mawrth 2025 1pm i 3pm, i agoriad Cymdeithas Celfyddydau Menywod Cymru. Edrychwn ymlaen at eich gweld yn yr Oriel Gelf Ganolog.

Arddangos yn Oriel

Os oes gennych ddiddordeb mewn arddangos eich gwaith neu gynnal gweithdai neu ddigwyddiadau yn oriel Celf Ganolog, llenwch ein ffurflen ar-lein:

Ffurflen Gais Arddangos

Nodwch: Mae’r broses geisio’n un gystadleuol ac ni fydd pob cais yn llwyddiannus.

Gwirfoddoli

Oes gennych ddiddordeb yn y celfyddydau? Mae Oriel Celf Ganolog yn chwilio am wirfoddolwyr. Byddai angen i wirfoddolwyr gynorthwyo ymwelwyr a’r Swyddog Datblygu’r Celfyddydau

01446 709805
tcharding@valeofglamorgan.gov.uk

Crefftau yn Oriel

Mae amrywiaeth o grefftwaith cyfoes ar werth yn oriel Celf Ganolog gan artistiaid o Gymru ac artistiaid rhyngwladol. Os oes gennych ddiddordeb mewn arddangos a gwerthu eich gwaith celf yn yr oriel, bydd angen i chi ddarparu manylion a lluniau o’ch gwaith ynghyd â CV a/neu lythyr eglurhaol.

01446 709805
tcharding@valeofglamorgan.gov.uk