Pobl Hŷn a Cham-drin Domestig

Gwybodaeth a chymorth i Ddioddefwyr Hŷn Cam-drin Domestig a Rhywiol 

Cam-drin domestig a Thrais Rhywiol

Mae cam-drin domestig a thrais rhywiol yn ymwneud â chamdriniwr neu gamdrinwyr sy'n gorfodi eu pŵer a'u rheolaeth dros rywun arall. Nid yw hyn yn rhywbeth sy'n cael ei brofi gan bobl ifanc yn unig – gall unrhyw un ddioddef cam-drin domestig a thrais rhywiol.

I rai pobl hŷn, bydd wedi bod yn nodwedd arwyddocaol am y rhan fwyaf o'u bywydau’n oedolion, yn broblem barhaus am 20, 30, a 40 mlynedd neu hyd yn oed yn hirach.

I eraill, bydd cam-drin domestig a thrais rhywiol yn dechrau pan fyddan nhw’n cyrraedd oedran hŷn a/neu’n dod yn eiddil neu â nam gwybyddol.

Pwy mae’r gamdriniaeth yn effeithio arnyn nhw?

Amcangyfrifir bod dros 40,000 o bobl hŷn yng Nghymru yn cael eu cam-drin yn eu cartrefi eu hunain bob blwyddyn.

Gall cam-drin domestig a thrais rhywiol effeithio ar unrhyw un waeth beth fo'u rhyw, tras ethnig, neu gyfeiriadedd rhywiol. Mae pobl ag anabledd mewn hyd yn oed mwy o berygl o gael eu cam-drin na'r rhai heb anabledd.

Pwy yw’r camdriniwr?

Gall y camdriniwr fod yn briod, cyn-briod, partner, cynbartner, mab, mab-yng-nghyfraith, merch, merch-yng-nghyfraith, wyr(es) neu aelod estynedig arall o'r teulu.

Mewn rhai achosion efallai y bydd mwy nag un camdriniwr hyd yn oed. Os oes gennych gysylltiad rheolaidd â gofalwyr neu staff meddygol, mae gweithdrefnau ar waith i'w helpu i ymdrin â datgeliadau yn gyfrinachol ac yn ymarferol.

Gall darparwyr cymorth arbenigol helpu, nid ydych ar eich pen eich hun.