Newyddion Cynllunio Diweddaraf

Ar 11 Hydref 2023 cafodd Awdurdodau Cynllunio Lleol ledled Cymru wybod gan Lywodraeth Cymru am newidiadau sy'n cael eu cyflwyno i Bennod 6 o Bolisi Cynllunio Cymru. Daeth y rhain i rym ar unwaith ar yr adeg honno a gellir eu crynhoi fel a ganlyn:

• Seilwaith Gwyrdd: Pwyslais cryfach ar gymryd ymagwedd ragweithiol tuag at seilwaith gwyrdd sy'n cwmpasu ystyriaethau traws-ffin, nodi allbynnau allweddol asesiadau seilwaith gwyrdd, cyflwyno datganiadau seilwaith gwyrdd cymesur gyda cheisiadau cynllunio a chyfeirio safonau Adeiladu â Natur.

• Budd Net ar gyfer Bioamrywiaeth a'r Ymagwedd Cam-ddoeth: Rhoddir eglurder pellach ynghylch sicrhau budd net i fioamrywiaeth drwy gymhwyso'r dull gweithredu cam doeth, gan gynnwys cydnabod mesurau iawndal oddi ar y safle fel dewis olaf, a, yr angen i ystyried gwella a rheoli tymor hir ar bob cam. Gwneir defnyddio'r datganiad seilwaith gwyrdd fel ffordd o ddangos yr ymagwedd fesul cam yn eglur.

• Amddiffyn Safleoedd o Ddiddordeb Gwyddonol Arbennig: Ymagwedd gryfach o ddiogelu SoDdGA, gyda mwy o eglurder ynghylch y sefyllfa ar gyfer rheoli safleoedd ac eithriadau ar gyfer mân ddatblygiadau sy'n angenrheidiol i gynnal 'tirwedd byw'. Ystyrir bod datblygiad arall yn annerbyniol fel mater o egwyddor.

• Coed a Choetiroedd: Aliniad agosach â'r dull gweithredu fesul cam, ynghyd â hyrwyddo plannu newydd fel rhan o ddatblygiad yn seiliedig ar sicrhau'r goeden gywir yn y lle iawn. O leiaf rhaid disodli unrhyw goeden a dorrir ar gymhareb o leiaf 3 coeden o fath a maint tebyg a phlannir ar gyfer pob 1 a gollir.

Gellir dod o hyd i'r Atodiad llawn yma:

Pennod 6 - Polisi Cynllunio Cymru

Yn fwy diweddar ar 7 Chwefror 2024 fe wnaeth Llywodraeth Cymru ddiweddaru Polisi Cynllunio Cymru gan ymgorffori'r newid uchod yn y ddogfen Polisi. Gellir gweld y fersiwn newydd hon (Fersiwn 12) ar wefan Llywodraeth Cymru yn llawn yma:

Polisi Cynllunio Cymru - Diweddariad Chwefror 2024

Y newid polisi allweddol yw cyflwyno gofyniad i bob cais cynllunio gynnwys Datganiad Seilwaith Gwyrdd. Mae adran berthnasol Polisi Cynllunio Cymru diwygiedig yn nodi:

6.2.12 Dylid cyflwyno datganiad seilwaith gwyrdd gyda'r holl geisiadau cynllunio. Bydd hyn yn gymesur â graddfa a natur y datblygiad a gynigir a bydd yn disgrifio sut mae seilwaith gwyrdd wedi'i ymgorffori yn y cynnig. Yn achos mân ddatblygiad bydd hwn yn ddisgrifiad byr ac ni ddylai fod yn ofyniad beichus i ymgeiswyr. Bydd y datganiad seilwaith gwyrdd yn ffordd effeithiol o ddangos canlyniadau amlswyddogaethol cadarnhaol sy'n briodol i'r safle dan sylw a rhaid ei ddefnyddio ar gyfer dangos sut mae'r dull gweithredu cam-ddoeth (Paragraff 6.4.15) wedi'i gymhwyso.

 Cyngor Awdurdod Cynllunio Lleol:

• Ar sail yr uchod mae'n ofynnol bellach i bob cais cynllunio (waeth beth yw graddfa'r datblygiad ond ac eithrio'r mathau canlynol o geisiadau) gynnwys Datganiad Seilwaith Gwyrdd

       Ceisiadau nad oes angen Datganiad Seilwaith Gwyrdd*:

• Cais am ganiatâd hysbyseb
• Cais caniatâd adeilad rhestredig yn unig
• Cais Tystysgrif Cyfreithlondeb
• Cais Hysbysiad ymlaen llaw 

Coed a Choetiroedd

Mae Polisi Cynllunio Cymru diwygiedig yn rhoi pwys ar goed, coetiroedd a gwrychoedd ar gyfer bioamrywiaeth ac am gyfraniad ehangach at gymeriad tirwedd, diwylliant, treftadaeth, lle, ansawdd aer, hamdden ac yn cydnabod eu bod yn chwarae rhan hanfodol wrth fynd i'r afael â'r argyfwng hinsawdd. Mae paragraff 6.4.37 yn nodi; “Dylid hyrwyddo pwysigrwydd coed, yn enwedig coed trefol, wrth greu lleoedd nodedig a naturiol sy'n darparu manteision iechyd a llesiant i gymunedau, nawr ac yn y dyfodol fel rhan o wneud cynlluniau a chymryd penderfyniadau”.

Mae paragraff 6.4.42 yn nodi ymhellach: “Dim ond lle byddai'n cyflawni manteision cyhoeddus sylweddol ac wedi'u diffinio'n glir y caniateir tynnu coed, coetir a gwrychoedd yn barhaol”.

Ar y sail hon bydd disgwyliad y caiff ceisiadau ar safleoedd â choed eu cefnogi gyda gwybodaeth briodol o Arolygon Coed a Tirlunio i lywio Datganiadau Seilwaith Gwyrdd.

Beth ddylai fy Ndatganiad Seilwaith Gwyrdd gynnwys?

Rhaid i bob cais cynllunio ddangos sut maen nhw'n amddiffyn ac yn gwella'r amgylchedd naturiol.

Dylai Datganiad Seilwaith Gwyrdd esbonio sut mae nodweddion presennol fel coed, gwrychoedd, gerddi a chynefinoedd wedi'u cadw, sut mae effeithiau wedi'u lleihau, a sut y bydd unrhyw golledion yn cael eu digolledu.

Rhaid i ddatblygiadau hefyd ddarparu gwelliannau bioamrywiaeth yn unol â pholisi cynllunio Cymru. Mae mesurau addas yn cynnwys blychau adar, blychau gwenoliaid duon, tai draenog, gwestai pryfed, plannu blodau gwyllt, coed a gwrychoedd brodorol.

Rhaid dangos yr holl welliannau bioamrywiaeth arfaethedig ar y cynlluniau a gyflwynir gyda'ch cais. Dylai'r mesurau hyn fod yn gymesur â graddfa'r datblygiad a'u lleoli o fewn ffin safle'r cais.

Gellir dod o hyd i gyngor cyffredinol ar gyfer ceisiadau cynllunio gan ddeiliaid tai drwy'r ddolen ganlynol Rhan 1 - Canllawiau a chyngor ar gyfer Ceisiadau gan Ddeiliaid Tai

Rhan 2 - Dylid cwblhau a dychwelyd Datganiad Seilwaith Gwyrdd a Gwella Bioamrywiaeth gyda'ch cais cynllunio

Cyngor Cyn Gwneud Cais

Mae Cyngor Bro Morgannwg yn parhau i gynnig cyngor cyn gwneud cais y byddem yn eich annog i'w ddefnyddio cyn cyflwyno cais cynllunio.