Cwrdd â’r Tîm

Adnoddau Corfforaethol

Mae’r Gyfarwyddiaeth yn gweithredu ystod o wasanaethau cefnogaeth i alluogi’r Cyngor i weithredu’n effeithiol, gan gynnwys adnoddau dynol, TG, gwasanaethau cyfreithiol a chyllid. Mae hefyd yn cynnwys swyddogaeth gwasanaethau democrataidd y Cyngor sy’n gweinyddu’r amrywiol bwyllgorau cabinet a chyfarfodydd cyngor lle gall aelodau etholedig wneud penderfyniadau a chraffu ar waith y sefydliad. 

Mae hefyd yn gyfrifol am ddatblygu strategaethau hir-dymor y sefydliad, trefniadau rheoli perfformiad, cydlynu’r modd y byddwn yn cyfathrebu gyda’r cyhoedd a rhedeg canolfan Cyswllt 1 Fro.

Amgylchedd a Thai

Mae’r gyfarwyddiaeth hon yn gyfrifol am ystod o wasanaethau amgylcheddol gan gynnwys glanhau a rheoli gwastraff, rheoli’r rhwydwaith ffyrdd, cynnal ein parciau a’n gofodau cyhoeddus, a goruchwylio’r ddarpariaeth drafnidiaeth gyhoeddus yn y Fro. 

Mae’r gyfarwyddiaeth hon hefyd yn gyfrifol am reoli stoc tai y Cyngor a darparu ystod o wasanaethau rheoliadol, megis safonau masnach, mewn partneriaeth â Chynghorau Caerdydd a Phen-y-bont trwy gyfrwng tîm y Fframwaith Rheoliadol a Rennir. 

Dysgu a Sgiliau

Cyfrifoldeb y gyfarwyddiaeth hon yw rhoi cyfleoedd i dderbyn addysg o safon i bawb ym Mro Morgannwg, yn ein hysgolion a’n canolfannau dysgu oedolion ill dau.

Mae’r tîm Dysgu a Sgiliau hefyd yn rheoli llyfrgelloedd Bro Morgannwg, yn darparu ystod eang o wasanaethau ieuenctid, ac yn cefnogi projectau celf ledled y sir.

Gwasanaethau Cymdeithasol

Y gyfarwyddiaeth hon yw cartref yr holl dimau sy’n gweithio gyda phobl yn y Fro sydd angen cymorth a gofal a chael eu diogelu. 

Mae hyn yn cynnwys plant a’u teuluoedd, pobl hŷn ac oedolion neu blant sydd â salwch neu anabledd.

Mae ein tîm gwasanaethau cymdeithasol yn gweithio i ddiogelu llesiant plant a phobl ifanc sydd mewn angen un ai o fewn eu teuluoedd, neu lle nad yw hynny’n bosibl drwy gynnig gofal amgen o ansawdd.

Mae’r gyfarwyddiaeth hefyd yn rhoi cefnogaeth i oedolion sydd angen help i fyw eu bywydau mor annibynnol ag y bo modd. Caiff y gefnogaeth yma ei darparu yn y tymor byr ac ar sail fwy parhaol.

Lle

Mae ein tîm Lle yn gyfrifol am dyfu a rhannu ffyniant ym Mro Morgannwg.  Mae'r tîm yn llywio twf economaidd a ffisegol y rhanbarth gan sicrhau bod y sylfeini economaidd yn eu lle i wella bywydau trigolion Bro Morgannwg.

Mae hyn yn cynnwys cyflawni ein swyddogaethau cynllunio statudol, tra hefyd yn arwain ein hymateb i'r argyfwng hinsawdd.

Rhoi cyfle i gydweithwyr weithio i wella canol trefi a chymdogaethau'r Fro a chydweithio â rhannau eraill o'r Cyngor a'n partneriaid rhanbarthol i sicrhau'r enillion gorau posibl ar fuddsoddiad i'r Cyngor a phobl Bro Morgannwg.